Афғонистонда ҳокимиятни эгаллаб турган “Толибон” ҳаракати афғон шаҳарлари учун кенг кўламли кузатув камералари тармоғини яратмоқда ва Хитойнинг Huawei компанияси билан ҳамкорлик бўйича музокаралар олиб бормоқда. Бу ҳақда Reuters ўз манбасига таяниб хабар берди.
“Толибон хавфсизликни тиклаш ва Афғонистон шаҳарларида содир этилган кўплаб йирик терактлар учун жавобгарликни ўз зиммасига олган ИШИДни йўқ қилишга эътибор қаратаётганини билдирди. Бу уларни Huawei билан ушбу соҳада эҳтимолий ҳамкорлик ҳақида маслаҳатлашишга ундади”, — дейилади Reuters хабарида.
Таъкидланишича, бутун мамлакат бўйлаб хавфсизлик камераларини ўрнатиш дастури Американинг Кобулдаги видеокузатув тизимини модернизация қилиш режасини ўзгартиришни ҳам назарда тутади.
Кобул ва бошқа шаҳарлардаги “нозик нуқталар”га эътибор қаратишни ўз ичига олган кенг кўламли дастурни тўлиқ амалга ошириш тўрт йил давом этади ва бу янги хавфсизлик стратегиясининг бир қисми бўлади, деди “Толибон” Ички ишлар вазирлиги матбуот котиби Абдулматин Қани.
“Ҳозирда биз Кобулнинг хавфсизлик харитаси устида ишлаяпмиз, бу харита хавфсизлик бўйича экспертлар томонидан тўлдирилган, у кўп вақт талаб этади. Бизда аллақачон иккита харита бор, бири аввалги ҳукумат учун АҚШ томонидан, иккинчиси Туркия томонидан яратилган”, — деди Қани.
Бироқ у лойиҳанинг амалга оширилиши ҳақида батафсил маълумот бермади.
Август ойида Bloomberg мунозаралардан хабардор шахсга таяниб, Huawei ва “Толибон” видеокузатув тизимини ўрнатиш ҳақидаги шартнома бўйича “оғзаки келишув”га эришгани ҳақида хабар берганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)