Тошкент ҳокимлиги “Дархон” мавзесида олиб ташланган ёғоч ҳайкаллар бўйича маълумот берди

Тошкент шаҳар ҳокимлиги Мирзо Улуғбек тумани “Дархон” мавзесидаги аҳоли дам олиш маскани билан боғлиқ хабарларга муносабат билдирди.

Ижтимоий тармоқларда 17 сентябрь куни “Дархон” кафеси рўпарасидаги собиқ “Сказка” боғидаги ёғоч монументлар олиб ташланаётгани тўғрисида хабарлар тарқалди. Аҳолига таниш бўлган жойидан олиниб, ҳудудни тўсиш учун таянчлар пайдо бўлган. Аҳоли ҳайкаллар олиб ташланганидан хавотир билдира бошлади.

Пойтахт ҳокимлигининг маълум қилишича, кўп йиллар давомида кўримсиз ҳолатга келиб қолган ушбу маскан, монументлар ва мавжуд фавворалар маҳалла фуқаролар йиғини билан келишилган ҳолда MDF Farmation МЧЖ томонидан қайта таъмирланади.

“Марказий, Мустақиллик шоҳкўчасида жойлашган аҳоли дам олиш масканини тартибга келтириш ишларидан хавотирга тушиб, монументларни сақлаб қолишда фаоллик кўрсатган фуқароларга ўз миннатдорлигимизни билдирамиз. Ҳамда аслида, лойиҳага кўра бу монументлар бутун ҳолатда жойига қайтарилиши кўзда тутилганини маълум қиламиз”, — дейилади муносабатда.

“Биз ҳайкалларни демонтаж қилиш жараёнида турли тахминлар ва миш-мишларга тарқалиши ҳамда шаҳар аҳолисини хавотирга солишига олиб келган хатога йўл қўйди. Дарҳақиқат, пойтахтнинг бошқа ҳудудлари қатори ушбу масканда ҳам иш фақат аҳолининг қулайлиги ва фаровонлигига қаратилган. Бу вазиятдан биз тегишли хулосалар чиқардик”, — дея тан олади ҳокимлик.

Бундан олдин Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ўзининг Telegram каналига пойтахтнинг Олмазор туманида дарахтлар дрел ёрдамида тешилиб, қуритилаётгани айтилган видеони жойлаштирганди.

Тошкент ботаника боғи хулосасига кўра, дарахтлар қуриш ҳолатига келиб қолган. Натижада Вазирлар Маҳкамасининг 2022 йил 22 августдаги 464-сонли қарорининг 4-иловасига асосан ўсимлик дунёсига 1 миллиард 97 миллион 184 минг сўм зарар етказилган.