АҚШ президентлигига номзод Хитойни асосий таҳдид деб атади

АҚШ учун асосий таҳдид Хитой, деди президентликка Республикачилар партиясидан номзод Вивек Рамасвами Fox News телеканалига берган интервьюсида.

“Бизга дуч келаётган биринчи рақамли таҳдид коммунистик Хитойдир. Энди эътиборимизни ҳозир мавжуд бўлмаган СССРга эмас, унга қаратишимиз керак”, — деди республикачи.

Аввалроқ Рамасвами “Хитой—Россия иттифоқи” Қўшма Штатлар учун “биринчи рақамли таҳдид” эканини айтганди.

 “Украинани қуроллантиришни давом эттириб, биз Россияни Хитой қўлига тутқазяпмиз”, — деб таъкидлаган у.

Август ойида президентликка номзод Украинадаги уруш бўйича Россияга ён беришга тайёрлигини маълум қилган. Хусусан, унинг сўзларига кўра, у Россия томонидан аннексия қилинган Украина ҳудудларини тан олишга ва Украинанинг НАТОга киришига қарши туришга тайёр. Шунингдек, у санкцияларни бекор қилишга ва Россияни жаҳон бозорига қайтаришга ваъда берди.

Fox News сўровига кўра, республикачилар праймеризларида сайловчиларнинг 11 фоизи Рамасвамини қўллаб-қувватламоқда. У Флорида губернатори Рон Десантис ва АҚШ собиқ президенти Дональд Трампдан орқада, уларни мос равишда 13 ва 60 фоиз сайловчилар қўллаб-қувватлашга тайёр.