Россия президенти Владимир Путин учун Дональд Трампнинг 2024 йилги АҚШ президентлик сайловларида ғалаба қозониши жуда муҳим. Марказий разведка бошқармаси собиқ директори Жон Бреннан MSNBC телеканалига берган интервьюсида шундай фикр билдирди.
Барак Обама даврида МРБни бошқарган Бреннан Трампнинг ғалабаси Украинага қарши урушда Россияга фойда келтиришини таъкидлади.
“Путин учун Дональд Трампнинг сайловда ғалаба қозониши мутлақо муҳим, деб ўйлайман. Путин ва Трамп бир-бирига хушомад қилиб, ўзаро манфаатлари учун ҳаракат қилади”, — деди Бреннан.
Шу билан бирга, МРБ собиқ раҳбари Трампнинг Оқ уйга қайтиши нафақат Украина, балки Ғарб учун ҳам номақбул бўлишига ишонч билдирди.
“Агар Трамп Оқ уйга қайтиб кела олса... Путин билан ҳамкорлик қилиши, у билан ҳамфикр бўлиши мумкин, бу, албатта, АҚШ манфаатларига ва, умуман, Ғарб манфаатларига зарар келтиради”, — дейди Бреннан.
АҚШ собиқ президенти Дональд Трамп агар у президент бўлса, Украинадаги урушни атиги бир кунда тугатиш бўйича музокара олиб боришини бир неча бор таъкидлаган. Россия президенти матбуот котиби Дмитрий Песков тегишли фикр ҳақиқатдан узоқ эмаслигини айтган. Песков Американинг ҳозирги президентида бундай имконият борлигини, лекин у Украинага қурол етказиб беришни танлаганини таъкидлаган.
Яқинда Путин 2024 йилги сайловларда Дональд Трампнинг ғалаба қозониши АҚШ билан муносабатларни ўзгартирмаслигини айтди.
Изоҳ (0)