Тошкент вилояти Чирчиқ шаҳрида субсидия асосида уй олиб бериш учун пул сўраган шахс қўлга олинди, деб хабар беради Бош прокуратура ҳузуридаги департамент.
Қайд этилишича, департаментнинг Чирчиқ шаҳар бўлими томонидан ИИБ ходимлари ҳамкорлигида тезкор тадбир ўтказилган. Тадбирда Х.Т. исмли шахс фуқаро Д.У.га гўёки юқори лавозимда ишловчи таниши орқали субсидия асосида кўп қаватли уйлардан хонадон олиб бериши эвазига 1,3 минг долларни олган вақтида ашёвий далилар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
5 август куни бош вазир Абдулла Арипов Тошкент шаҳрида Азия Инвест Фаворит МЧЖ томонидан қурилаётган кўп қаватли уй-жойлардаги хонадонларнинг фуқароларга сотилиши юзасидан келиб чиққан низоли вазият қатнашчилари билан учрашув ўтказганди.
Маълумотларга кўра, ушбу МЧЖ мансабдорлари томонидан фуқароларга етказилган зарар 300 миллиард сўмдан ошади. Ҳолат юзасидан Жиноят кодексининг 168-моддаси (фирибгарлик) 4-қисми билан жиноят иши қўзғатилган.
Бош вазир ўринбосари Очилбой Раматов бошчилигидаги ҳукумат комиссияси томонидан Бош прокуратура билан ҳамкорликда 2 та ҳолат бўйича ҳам жабрланган фуқароларнинг муаммоларини ҳал этиш юзасидан тайёрланган таклифлар эълон қилинган.
Изоҳ (0)