Леонардо Бонуччи “Ювентус”ни судга беради

Италиялик футболчи Леонардо Бонуччи “Ювентус”ни судга бермоқчи.

Эслатиб ўтамиз, июль ойида туринликлар футболчини асосий таркибдан четлатганди ва трансферга қўйганди. Шундан сўнг Бонуччи Берлиннинг “Унион” жамоаси сафига ўтди.

Жанлука ди Марционинг хабар беришича, Леонардо собиқ жамоасини судга беришга қарор қилган. Футболчи “Ювентус”ни уни таркибдан четлатгандан сўнг, одатдагидек машғулотларда иштирок эта олмагани ва бунинг натижасида профессионал фаолияти ва имижига путур етганликда айбламоқда.

Бонуччи “бьянконерилар” унга етказилган зарар учун компенсация тўлашини истамоқда. Бу иш билан Леонинг адвокатлари шуғулланмоқда.

Агар суд унинг талабларини қондирса, олинган пуллар хайрия ишларига сарфланади.

Италиялик футболчи пулларни Neuroland ва Live Onlus компанияларига ўтказмоқчи. Биринчи ташкилот болалар нейрохирургияси бўлимида ётганларнинг болаларнинг оиласини қўллаб-қувватласа, иккинчи ташкилот машҳур спортчиларнинг буюмларини кимошди савдосида сотиш орқали спорт клублари, мактаблар ва муниципалитетлар учун дефибрилаторлар сотиб олади ва совға қилади.