Ўзбекистонда жамоат жойларида шахсини идентификация қилиш имконини бермайдиган даражада юзини тўсганлик учун маъмурий жавобгарлик белгиланиши кутилмоқда.
Олий Мажлис Қонунчилик палатасининг 5 сентябрь куни бўлиб ўтган мажлисида депутатлар томонидан “Ўзбекистон Республикасининг Жиноят кодексига ва Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида”ги қонун лойиҳаси кўриб чиқилиб, қабул қилинди.
Унда жамоат тартибини сақлаш бўйича кўрилаётган чоралар, хусусан “Хавфсиз шаҳар” концепцияси доирасида жорий этилган ахборот дастурларининг самарадорлигини янада ошириш мақсадида жамоат жойларида шахсини идентификация қилиш имконини бермайдиган даражада юзини тўсган ҳолда бўлганлик учун маъмурий жавобгарлик чораси киритилмоқда.
Бунда, жавобгарликни истисно қилувчи ҳолат сифатида тиббий кўрсатма асосида ёки меҳнат ва хизмат фаолияти билан боғлиқ ҳолатларда ёхуд йўл-транспорт ҳаракатида хавфсизликни таъминлаш учун кийиладиган махсус бош-кийимда ёки спорт ва маданий тадбирлар пайтида уларнинг иштирокчилари томонидан, шунингдек, қонунчиликда рухсат этилган бошқа ҳолатларда юзини тўсган ҳолда бўлиш ҳолати белгиланмоқда.
Мажлисда қайд этилишича, ушбу қонун лойиҳасининг қабул қилиниши жамоат тартибини сақлаш бўйича кўрилаётган саъй-ҳаракатларнинг самарадорлигини оширишга хизмат қилади.
Изоҳ (1)
Men qarshiman, deputatlardan faqat maʼnoga ega boʼlgan qonunlarni Qabul qilishlarini soʻrayman.