Буюк Британиянинг собиқ мудофаа вазири Бен Уоллес истеъфога чиқишидан бир оз олдин АҚШ билан дипломатик можаро қўзғатган. Бу ҳақда The Times хабар берди.
Хабарга кўра, Уоллес қиймати 2,3 миллиард фунт стерлинг бўлган 14 та Америка Chinook H-47 вертолётларини етказиб бериш бўйича шартномани бекор қилишга уринган. Шартномага асосан Boeing томонидан ишлаб чиқарилган вертолётларни етказиб бериш 2026 йилда бошланиши керак.
Пентагон АҚШ ва НАТОнинг бошқа давлатлари билан қўшма операцияларда қатнашиш учун Буюк Британияга техникалар зарурлигини билдирган.
Бироқ сўнгги ҳафталарда Бен Уоллес шартномага шубҳа қилгани ва Британия мудофаа бюджетига босимни камайтириш учун уни бекор қилишни таклиф қилгани айтилмоқда.
10 август куни у Пентагон раҳбари Ллойд Остинга мактуб йўллаб, Лондоннинг вертолётлар сотиб олиш бўйича келишувни қайта кўриб чиқиш режалари ҳақида маълум қилган.
Бунга жавобан АҚШ расмийлари мамлакатдаги Британия элчиси Карен Пирсга баёнот бериб, у орқали бош вазир Риши Сунакга шартномани бекор қилиш “ёмон фикр” экани ҳақидаги хабарни етказган.
Британия расмийлари америкалик ҳамкасбларини Уоллес лавозимини тарк этгандан кейин муаммо ҳал қилинишига ишонтирган, — дейди нашр манбалари.
Британия ҳукуматининг баъзи аъзолари Уоллес бу ҳаракатлари билан америкаликларни АҚШ президенти унинг НАТО бош котиби лавозимига номзодини қўллаб-қувватламагани учун ғазаблантирмоқчи бўлган деб ҳисоблайди.
Бироқ вазирга яқинлар бу воқеалар ўртасидаги боғлиқликни инкор этади. Уоллес аввал ҳам юқори қийматли шартномага қарши чиққанди. Британияда аллақачон 60 та Америка Chinook бор ва унинг авиатехника парки НАТОнинг Европа аъзолари орасида энг каттаси ҳисобланади.
Британия мудофаа вазири истеъфоси
Бен Уоллес 2019 йил июлидан бери Буюк Британия мудофаа вазири лавозимида ишлаган. У Британия ҳукумати Россия қўшинларининг Украинага бостириб киришига қандай муносабатда бўлишида муҳим рол ўйнаган.
Хусусан, Британия Украинага 250 километрдан ортиқ масофага учадиган “Storm Shadow” қанотли ракеталарини етказиб берган биринчи Ғарб давлати бўлган. Уоллес 2023 йил 31 августда истеъфога чиқди.
Унинг ўрнига Грант Шеппс Британия мудофаа вазири этиб тайинланди. У февраль ойидан бери Энергетика хавфсизлиги ва углерод нейтраллиги вазири лавозимида ишлаб келаётганди.
Изоҳ (0)