АҚШда 142 йил аввал чўкиб кетган кема мукаммал ҳолатда топилди (фото)

АҚШнинг Мичиган кўлида 1881 йилда чўкиб кетган Trinidad кемасининг қолдиқлари топилди. Бу ҳақда The New York Times хабар берди.

Икки йиллик қидирувдан сўнг тадқиқотчилар қирғоқдан 20 километр узоқликда, тахминан 90 метр чуқурликда Trinidad қолдиқларини аниқлади. Кема 1867 йилда Нью-Йоркдаги “Гранд-Айленд”да қурилган ва дон савдосида юк кемаси сифатида фойдаланилган.

Ўша пайтдаги газетада эълон қилинган мақолада узунлиги 40 метрдан ортиқ бўлган Trinidad “энг яхши елканли кемалардан бири” деб таърифланган. Шу билан бирга, суғурта ёзувлари кема эгалари ундан фаол фойдаланмаганини кўрсатади. Шунинг учун у ўша даврдаги кўпчилик елканли кемаларга қараганда 2-3 баравар кам хизмат қилган.

Trinidad доимо сув сизишидан азият чеккан ва охир-оқибат 1881 йил баҳорида саёҳатнинг ўртасида чўкиб кетган. Тадқиқотчилар қидиришни икки йил аввал бошлаган.

“Кема кашфиёт учун идеал кандидат эди, чунки унинг капитани кема қаерга чўкиб кетганини батафсил тасвирлаган. Июль ойида гидролокатор орқали унинг қолдиқлари аниқланган.

Кемада идиш-товоқлар сақланган шкафлар, экипажнинг барча буюмлари қолиб кетганини кўриб, ҳайратда қолдик. Бу ҳақиқатан ҳам бутилка ичидаги кемага ўхшайди. У вақт капсуласи”, — дейилади хабарда.

Тадқиқотчиларнинг таъкидлашича, бу штатдаги яхши сақланиб қолган ягона чўкиб кетган кема эмас, аммо у “энг яхши кемалар қаторига киради”.

Қайд этилишича, Trinidad келаси йили Тарихий жойлар миллий реестрига киритилади ва чўкиб кетган кеманинг аниқ жойлашуви ҳам эълон қилинади.