Қашқадарё вилоятида Мустақиллик байрами муносабати билан пенсионерларнинг 300 миллиард сўмдан ортиқ пенсия пуллари муддатидан аввал тўлаб берилди. Бу ҳақда “Дарё”га Бюджетдан ташқари Пенсия жамғармасининг Қашқадарё вилояти бошқармаси маълум қилди.
Масъулларнинг маълумот беришича, Мустақилликнинг 32 йиллик байрами 2023 йилнинг 1 сентябрь — жума ҳамда 2—3 сентябрь шанба ва якшанба дам олиш кунига тўғри келгани боис, кекса ёшдаги пенсия ва нафақа олувчиларни, ногиронлиги бўлган шахсларни қўллаб-қувватлаш ҳамда Мустақиллик байрамини кўтаринки руҳда кутиб олишларини таъминлаш мақсадида, пенсия ва нафақа тўловларини нақд пулсиз (банк карта) шаклда муддатидан аввал амалга оширган.
Бошқарма томонидан 413 минг 801 нафар пенсия ва нафақа олувчи фуқароларга жами 440,7 миллиард сўмлик тўлов қайдномалари шакллантирилиб, мазкур маблағлар тижорат банкларига юборилди. Тўловларни банк картаси орқали олувчиларга бугунги кунда жами 300,8 миллиард сўмлик маблағлар муддатидан олдин тўлиқ тўлаб берилди. Нақд пул шаклида пенсия ва нафақа олувчиларга тўловлар 4 сентябрь кунидан бошлаб, “Халқ банки”нинг сайёр кассалари томонидан графикка мувофиқ амалга оширилади, — дейди бошқарма бошлиғи Алишер Ражабов.
Изоҳ (0)