Тошкент шаҳар Миробод туманидаги Якуб Колас кўчасининг бир қисми автомобиллар ҳаракати учун вақтинча ёпилди, деб хабар беради пойтахт ҳокимлиги матбуот хизмати.
Маълум қилинишича, Ўзбекистон президентининг 2023 йил 11 мартдаги “Тошкент шаҳридаги истемолчиларни энергия ресурслари билан барқарор таминлаш чора-тадбирлари тўғрисида”ги қарорига мувофиқ, барча ҳудудларда электр тармоқлари кабелларини, трансформаторларни янгилаш-таъмирлаш ишлари олиб борилмоқда.
Миробод туманининг Якуб Колас кўчаси ҳудудида 18х6 метр узунликдаги 110 киловатт бўлган юқори кучланишли ерости электр узатиш кабел тармоқларини ўтказиш ишлари амалга оширилмоқда. Шу сабабли, 28 август кунидан 4 сентябрь кунига қадар Якуб Колас кўчасининг Миробод тумани тиббиёт бирлашмаси Марказий кўп тармоқли поликлиникаси ёнидан 20 метр узунликдаги (110-умумтаълим мактаби қаршиси) қисми барча турдаги автотранспорт воситалари ҳаракати учун ёпилди.
“Ҳайдовчилардан ноқулайликлар учун узр сўраб, айланма йўллардан фойдаланишларини тавсия этамиз”, — дейилади хабарда.
Бундан олдин Тошкентда Мустақиллик байрамига бағишланган халқаро оммавий югуриш мусобақаси сабаб айрим кўчалар ёпилиши тўғрисида хабар берилганди.
Изоҳ (0)