Агар узоқ вақт давомида шовқинли шаҳарда яшаётган бўлсангиз, сизда ҳеч бўлмаса бир маротаба табиат қўйнига қочиш истаги пайдо бўлган. Ҳар доим ҳам бу ишни амалга оширишнинг имкони бўлавермайди, бироқ маҳоратли режиссёрлар томонидан суратга олинган айрим фильмларда табиатнинг барча гўзалликларини кўриш мумкин. Қуйида табиатнинг ҳайратланарли манзараларини ўзида акс эттирган машҳур фильмлар ҳақида маълумот берилади.
“Ёввойи табиат қўйнида” — 2007 йил
Крис Маккендлесс — энг яхши коллеж талабаларидан бири, у Гарвард университетига кириш учун барча имкониятларга эга бўлади. Бироқ у ўз келажагини бутунлай бошқача кўради. Крис молиявий аҳволи ва муваффақиятли мартаба ҳақида қайғурмайди. У барча тўплаган пулларини хайрия жамғармасига беради ва Аляскада яшашга қарор қилади. Бош қаҳрамон янги тажрибага эга бўлиш учун ўзи билан харита ва компасни олмайди. У йўлда ўз ҳаётий ҳикояларини баҳам кўришга тайёр бўлган жуда кўп қизиқарли шахслар билан учрашади. Табиатнинг барча гўзалликларини суратга олиш мақсадида суратга олиш гуруҳи яриморолга 4 марта келиб, томошабинларга барча фаслларни кўрсатган.
“Жулеттага мактуб” — 2010 йил
Америкалик Софи исмли аёл ўзининг турмуш ўртоғи Виктор билан Веронага боради. Орадан кўп ўтмай у ёлғиз қолади, турмуш ўртоғи иши туфайли Софини ташлаб кетади. Бироқ бош қаҳрамон вақтни беҳуда сарфламайди. У Жулетта ҳайкали олдида ўз хабарларини қолдирган аёлларнинг хатларига жавоб бериш билан машғул бўлади. Шундан сўнг Софи Клер ва унинг набираси Чарли билан учрашади, улар кутилмаган жавобдан сўнг Италияга аёлнинг ёшликдаги муҳаббатини топиш илинжида келади. Софи уларга ҳамроҳ бўлишга мажбур бўлади, сўнгра унинг қизиқарли саёҳати бошланади. Ушбу фильм нафақат қизиқарли сюжети, балки сеҳрли манзаралари билан ҳам томошабинни ўзига жалб қилади.
“Уолтер Миттининг ғаройиб ҳаёти” — 2013 йил
Уолтер Митти — Life журналининг иллюстратори. Бош қаҳрамоннинг ҳаёти жуда зерикарли, у тез-тез ўзининг хаёлий дунёсига шўнғийди. Кунлардан бир куни унга машҳур сайёҳ Шон O’Коннелнинг журналнинг навбатдаги сонига зарур бўлган фотосуратини топиш вазифаси юкланади. Бироқ бу вазифа жуда қийин бўлиб чиқади, чунки эски фотосуратига қараганда Шоннинг ўзини топиш жуда осон. Саёҳатчини излашга борган Валтер уни унутилмас саргузашт кутаётганини, бундан кейин унинг ҳаёти драматик тарзда ўзгариб кетишини билмайди.
“Ёввойи” — 2014 йил
Шерил Стрейднинг ҳаётида қийин давр бошланади: у онасини йўқотиш ва турмуш ўртоғи билан ажрашиш ҳолатини бошдан кечиради. Айнан шу дақиқада бош қаҳрамон ўз ҳаётини ўзгартиришни хоҳлаётганини тушунади, бироқ у психологга бориш ўрнига, тоққа чиқишни танлайди. Шерил бу каби саёҳатлар ҳақида маълумотга эга бўлмайди, бироқ бу уни тўхтата олмайди. Бош қаҳрамон йўлда кўплаб қийинчиликларга дуч келади. Янги тажриба унга ҳаётини қайта кўриб чиқишга ёрдам беради. Лойиҳадаги манзаралар ҳар бир томошабинни ўзига жалб қилади.
“Дом-даракциз Бернадетт”, — 2019 йил
Фильм бир вақтлар машҳур архитектор бўлган Бернадетт Фокс ҳақида ҳикоя қилади. У ўз ишига шунчалик берилиб кетадики, оиласи ва уйини унутиб қўяди. Баъзилар қаҳрамонга янги лойиҳаларни бошлашни, бошқалари эса саёҳатга чиқишни маслаҳат беради. Кунлардан бир кун Бернадетт оиласини огоҳлантирмасдан ғойиб бўлади. У Антарктидага бориб қолади ва кўплаб қийинчиликларни бошдан кечиради. Фильмда совуқ океаннинг гўзал манзаларини кўриш мумкин.
“Кўчманчилар мамлакати” — 2020 йил
Фильмда турмуш ўртоғининг вафотидан кейин унинг мулкини сотишга ва машина сотиб олишга қарор қилган америкалик аёл Ферн ҳақида ҳикоя қилинади. Ферн эски-туски нарсаларини фургонга солиб, замонавий кўчманчига айланади, у мавсумий иш излаб, штатлардан штатларга саёҳат қилади. Бош қаҳрамоннинг йўлидан унга ёрдам беришга тайёр бўлган кўплаб кўчманчилар чиқади. Фернни доим бир савол: келган жойида қолиш ёки саёҳатини давом эттириш саволи қийнайди. Фильм уч марта “Оскар” мукофотини олган ва бу ерда гап нафақат ажойиб актёрлик ва режиссёрликда, балки 2020 йилги пандемияда табиат гўзалликларига қойил қолиш жуда ёқимли бўлганида ҳамдир.
Изоҳ (0)