Agar uzoq vaqt davomida shovqinli shaharda yashayotgan bo‘lsangiz, sizda hech bo‘lmasa bir marotaba tabiat qo‘yniga qochish istagi paydo bo‘lgan. Har doim ham bu ishni amalga oshirishning imkoni bo‘lavermaydi, biroq mahoratli rejissorlar tomonidan suratga olingan ayrim filmlarda tabiatning barcha go‘zalliklarini ko‘rish mumkin. Quyida tabiatning hayratlanarli manzaralarini o‘zida aks ettirgan mashhur filmlar haqida ma’lumot beriladi.
“Yovvoyi tabiat qo‘ynida” — 2007-yil
Kris Makkendless — eng yaxshi kollej talabalaridan biri, u Garvard universitetiga kirish uchun barcha imkoniyatlarga ega bo‘ladi. Biroq u o‘z kelajagini butunlay boshqacha ko‘radi. Kris moliyaviy ahvoli va muvaffaqiyatli martaba haqida qayg‘urmaydi. U barcha to‘plagan pullarini xayriya jamg‘armasiga beradi va Alyaskada yashashga qaror qiladi. Bosh qahramon yangi tajribaga ega bo‘lish uchun o‘zi bilan xarita va kompasni olmaydi. U yo‘lda o‘z hayotiy hikoyalarini baham ko‘rishga tayyor bo‘lgan juda ko‘p qiziqarli shaxslar bilan uchrashadi. Tabiatning barcha go‘zalliklarini suratga olish maqsadida suratga olish guruhi yarimorolga 4 marta kelib, tomoshabinlarga barcha fasllarni ko‘rsatgan.
“Julyettaga maktub” — 2010-yil
Amerikalik Sofi ismli ayol o‘zining turmush o‘rtog‘i Viktor bilan Veronaga boradi. Oradan ko‘p o‘tmay u yolg‘iz qoladi, turmush o‘rtog‘i ishi tufayli Sofini tashlab ketadi. Biroq bosh qahramon vaqtni behuda sarflamaydi. U Julyetta haykali oldida o‘z xabarlarini qoldirgan ayollarning xatlariga javob berish bilan mashg‘ul bo‘ladi. Shundan so‘ng Sofi Kler va uning nabirasi Charli bilan uchrashadi, ular kutilmagan javobdan so‘ng Italiyaga ayolning yoshlikdagi muhabbatini topish ilinjida keladi. Sofi ularga hamroh bo‘lishga majbur bo‘ladi, so‘ngra uning qiziqarli sayohati boshlanadi. Ushbu film nafaqat qiziqarli sujeti, balki sehrli manzaralari bilan ham tomoshabinni o‘ziga jalb qiladi.
“Uolter Mittining g‘aroyib hayoti” — 2013-yil
Uolter Mitti — Life jurnalining illyustratori. Bosh qahramonning hayoti juda zerikarli, u tez-tez o‘zining xayoliy dunyosiga sho‘ng‘iydi. Kunlardan bir kuni unga mashhur sayyoh Shon O’Konnelning jurnalning navbatdagi soniga zarur bo‘lgan fotosuratini topish vazifasi yuklanadi. Biroq bu vazifa juda qiyin bo‘lib chiqadi, chunki eski fotosuratiga qaraganda Shonning o‘zini topish juda oson. Sayohatchini izlashga borgan Valter uni unutilmas sarguzasht kutayotganini, bundan keyin uning hayoti dramatik tarzda o‘zgarib ketishini bilmaydi.
“Yovvoyi” — 2014-yil
Sheril Streydning hayotida qiyin davr boshlanadi: u onasini yo‘qotish va turmush o‘rtog‘i bilan ajrashish holatini boshdan kechiradi. Aynan shu daqiqada bosh qahramon o‘z hayotini o‘zgartirishni xohlayotganini tushunadi, biroq u psixologga borish o‘rniga, toqqa chiqishni tanlaydi. Sheril bu kabi sayohatlar haqida ma’lumotga ega bo‘lmaydi, biroq bu uni to‘xtata olmaydi. Bosh qahramon yo‘lda ko‘plab qiyinchiliklarga duch keladi. Yangi tajriba unga hayotini qayta ko‘rib chiqishga yordam beradi. Loyihadagi manzaralar har bir tomoshabinni o‘ziga jalb qiladi.
“Dom-daraksiz Bernadett”, — 2019-yil
Film bir vaqtlar mashhur arxitektor bo‘lgan Bernadett Foks haqida hikoya qiladi. U o‘z ishiga shunchalik berilib ketadiki, oilasi va uyini unutib qo‘yadi. Ba’zilar qahramonga yangi loyihalarni boshlashni, boshqalari esa sayohatga chiqishni maslahat beradi. Kunlardan bir kun Bernadett oilasini ogohlantirmasdan g‘oyib bo‘ladi. U Antarktidaga borib qoladi va ko‘plab qiyinchiliklarni boshdan kechiradi. Filmda sovuq okeanning go‘zal manzalarini ko‘rish mumkin.
“Ko‘chmanchilar mamlakati” — 2020-yil
Filmda turmush o‘rtog‘ining vafotidan keyin uning mulkini sotishga va mashina sotib olishga qaror qilgan amerikalik ayol Fern haqida hikoya qilinadi. Fern eski-tuski narsalarini furgonga solib, zamonaviy ko‘chmanchiga aylanadi, u mavsumiy ish izlab, shtatlardan shtatlarga sayohat qiladi. Bosh qahramonning yo‘lidan unga yordam berishga tayyor bo‘lgan ko‘plab ko‘chmanchilar chiqadi. Fernni doim bir savol: kelgan joyida qolish yoki sayohatini davom ettirish savoli qiynaydi. Film uch marta “Oskar” mukofotini olgan va bu yerda gap nafaqat ajoyib aktyorlik va rejissorlikda, balki 2020-yilgi pandemiyada tabiat go‘zalliklariga qoyil qolish juda yoqimli bo‘lganida hamdir.
Izoh (0)