Кенг миқёсли босқин бошидан бери Россия қўшинлари Украинага камида 1 961 та Shahed типидаги дронларни учирди. Бу ҳақда Украина президенти Владимир Зеленский урушнинг 526-куни якунлари бўйича йўллаган видеомурожаатида маълум қилди.
Унинг сўзларига кўра, украиналик ҳарбийлар камикадзе дронларининг “асосий қисмини” уриб туширишга муваффақ бўлган.
“Афсуски, ҳаммаси эмас. Биз янада кўпроқ (дронларни) уриб тушириш устида ишлаяпмиз: имкон қадар кўпроқ уриб тушириш устида. Кўпроқ ҳаво мудофаа тизимларига эга бўлиш учун ишлаяпмиз”, — деб қўшимча қилди Зеленский.
Россия армияси Украинада Эронда ишлаб чиқарилган Shahed-131/136 камикадзе дронларидан фаол фойдаланмоқда, руслар уларнинг номини “Геран-1” ва “Геран-2” деб ўзгартирган. Украина ҳукумати мунтазам равишда Россия ҳарбийлари Украина ҳарбий, фуқаролик ва энергетика объектларига дрон учираётгани ҳақида хабар бериб келади.
Июль ойи охирида Украина Қуролли кучлари Россия қўшинлари Эроннинг Россияда ишлаб чиқарилган Shahed дронларидан фойдаланишни бошлаганини маълум қилди. Ушбу дронларни йиғиш Татаристондаги “Алабу”га махсус иқтисодий зонаси ҳудудида амалга оширилаётгани айтилди. Маҳаллий журналистларнинг суриштирувига кўра, 15-16 ёшли коллеж ўқувчилари Эрон компонентларидан жанговар дронларни йиғишга мажбурий жалб этилмоқда.
Изоҳ (0)