Об-ҳаво нафақат инсонларга, балки электрон қурилмаларга ҳам ёмон таъсир кўрсатиши мумкин. Қуйида уяли телефон бузилишининг олдини олишда оддий, аммо самарали усуллар ҳақида маълумот берилади.
Статистик маълумотларга кўра, коронавирус пандемияси ва ўзини ўзи изоляция қилиш режими даврида бутун дунё бўйлаб инсонлар мобил телефонлардан кўпроқ фойдаланган. Мутахассисларнинг таъкидлашича, смартфондан мунтазам фойдаланишга бўлган бундай талаб гаджетни сақлаб қолиш қобилиятига сезиларли даражада таъсир қилади. Бундан ташқари, хизмат кўрсатиш марказларига қўнғироқлар статистикаси ўсиб бормоқда ва иссиқ об-ҳаво ҳам вазиятга ўз таъсирини кўрсатди. Бу ҳақда IT-эксперт, Mail.ru Group’нинг стратегия ва медиа-лойиҳаларни ривожлантириш директори Дмитрий Рябинин сўзлаб берди.
У ёзда гаджетлар нима сабабдан тез ишдан чиқишини тушунтириб берди, шунингдек, телефоннинг ишдан чиқишидан ҳимоя қилишга ёрдам берадиган оддий лайфхаклар билан ўртоқлашди. Қум ҳаттоки энг бардошли смартфон экранига зарар етказиши мумкин ва агар у гаджет ичига кирса, электрон компонентларнинг ишдан чиқишига сабаб бўлади. Бунга йўл қўймаслик учун мутахассис телевизор пультларини ва гаджетни пластик шаффоф ғилофга ўраш учун тез-тез қўлланилган усулни эслаб қолишни маслаҳат беради.
“Ҳозир гаджетлар учун аномал хавфли мавсум. Гап шундаки, коронавирус ва масофавий иш бизни шундай ҳолатга олиб келдики, биз смартфонлар ва гаджетлардан кўпинча ноқулай шароитларда фойдаланишни кучайтирдик. Буларнинг барчаси ёзги ҳароратнинг кўтарилиши билан боғлиқ. Ҳозирда таъмирлаш хизматлари сўровлари сезиларли ўсиш статистикасини кўрсатмоқда ва ёздан кейин уларнинг сони янада кўпаяди”, — дейди мутахассис.
Ёзда гаджетларнинг идеал ишлаш муддати нафақат иссиқда фаол фойдаланиш, балки улар билан пляжга бориш туфайли ҳам қисқаради. Мутахассис смартфонни бошқа материаллардан ҳимоя қилиш кераклиги ҳақида фикр билдирган.
“Энг оммабоп хатолардан бири — техникаларни соҳилга олиб бориш. Бир вақтнинг ўзида бир нечта хавфли омиллар: сув, тўғридан тўғри қуёш нури ва ўғирлик қурбони бўлиш хавф солади. Лой ва қум ҳам техникалар учун жуда хавфли. Кичик қум доналари қурилманинг экранига сезилмайдиган даражада зарар етказиши, шунингдек, корпус ичига кириши мумкин. Бу ҳатто техника чўнтак ёки сумкангизда турганда ҳам содир бўлиши мумкин. Пляжда гаджетлардан кам фойдаланиш ва уларни ғилофларда сақлаган маъқул. Шу орқали экраннинг шикастланиш хавфини камайтирасиз”, — дейди Дмитрий Рябинин.
Маълумки, барча электрон ускуналар ишлаш пайтида иссиқлик ҳосил қилади. Агар қуёш нури смартфонга тўғридан тўғри таъсир қилса, бу қурилмага зарар етказиши ёки ҳатто батареяни ишдан чиқариши мумкин. Бундай ҳолатни олдини олиш учун, биринчи навбатда оригинал қувватлагичлардан фойдаланишингиз керак. Гап шундаки, бундай қувватлагичлар уни тўлиқ заряддан кўра узоқроқ зарядлаши мумкин, бу эса батареянинг ҳарорати ошишига олиб келади.
Бундан ташқари, мутахассислар иссиқ об-ҳавода телефонингизни имкон қадар камроқ қувватлантиришни маслаҳат беради. Бу ишни кечқурун ёки кечаси амалга оширган маъқул. Бироқ бундай эҳтиёж пайдо бўлса, мобил қурилмани сояда жойлаштиришга ҳаракат қилинг.
Агар телефон қизиб кетган бўлса, чиқадиган иссиқлик қўлларингизни “ёқиб юборади”, агар смартфоннинг ғилофи бўлса, уни олиб ташланг. У қурилмани ерга тушганда шикаст етишидан ҳимоя қилса-да, иссиқлик изоляция қилувчи қобиқ вазифасини бажариб, уяли телефон вентиляциясини ҳам қийинлаштиради.
Кейин барча кераксиз иловалар ва симсиз алоқани ўчиринг ҳамда экран ёрқинлигини камайтиринг. Телефонингиз қанча кам электр энергияси ишлатса, шунчалик кам исийди. Ҳозирда деярли барча қурилмалар батареяни тежаш хусусиятига эга. Бунда смартфон барча хизматлардан фойдаланиш имкониятини максимал даражада чеклайди, автоматик равишда экран ёрқинлигини пасайтиради ва минимал энергия сарфлайди.
Бундан ташқари, иссиқда гаджет билан ишлашда хавфсизлик қоидаларини эътиборсиз қолдирманг. Зарядлаш жараёнида қувват адаптери, зарядловчи ва қуёш нури телефоннинг ўзига таъсир қилмаслиги керак, чунки бу қисқа туташувга, ўта оғир ҳолатларда қурилма ёки адаптернинг ёниб кетишига олиб келиши мумкин.
Изоҳ (0)