Ўзбекистонда жорий йил бошидан бери 3 минг гектардан ортиқ ерлар ўзбошимчалик билан эгаллаб олинган. Бу ҳақда Кадастр агентлиги хабар берди.
Қайд этилишича, 2023 йил бошидан 1 августга қадар ўзбошимчалик билан эгалланган ерлар 9 122 та ҳолатда 3 минг гектардан ортиқни ташкил этган. Шундан қонун бузилиши ҳолатини ихтиёрий бартараф этганлар сони 4235 тага етган.
“Фуқаролик ишлари бўйича судларга киритилган даъво аризалари сони 2 538 та, қўшма тартиб асосида прокуратура органларига юборилган ҳолатлар 498 та, суднинг ҳал қилув қарори қабул қилинганлар 591 та ва суд жараёни давом этаёт ҳолатлар сони 1915 та”, — дея хабар қилган агентлик.
2022 йилда республика бўйича ер участкаларини ўзбошимчалик билан эгаллаш билан боғлиқ 18 597 та (6 307 гектар) ҳолат аниқланганди. Қонунбузарларга нисбатан тегишли чоралар кўрилган.
Эслатиб ўтамиз, ўзбошимчалик билан эгаллаб олинган ер майдонларини ер эгасига қайтариш тартиби Ер кодексининг 91-моддасида белгилаб қўйилган.
“Ўзбошимчалик билан эгаллаб олинган ер участкалари уларга ғайриқонуний равишда эгалик қилинган ва фойдаланилган вақтда қилинган сарф-харажатлар қопланмаган тарзда тегишлилигига кўра қайтарилади. Ер участкаларини фойдаланиш учун яроқли ҳолатга келтириш, шу жумладан ундаги иморатларни бузиш ер участкаларини ўзбошимчалик билан эгаллаб олган шахслар ҳисобидан амалга оширилади”,— дея огоҳлантирган агентлик.
Қўшимча қилинишича, ўзбошимчалик билан эгаллаб олинган ер участкасини ер эгасига, ердан фойдаланувчига, ер участкаси ижарачисига ёки мулкдорига қайтариш тегишли туман, шаҳар, вилоят ҳокимининг қарорига биноан ёки суднинг ҳал қилув қарорига кўра амалга оширилади.
Изоҳ (0)