UzAuto Motors Cobalt, Lacetti, Damas автомобиллари сотувини эълон қилгач, шартномалар бир кунда тамом бўлган. Аммо айрим “тадбиркорлар” ўзи учун олган шартномаларга устама қўйиб, OLX сайти орқали пулламоқда.
UzAuto Motors 8 ойлик танаффусдан сўнг, 4 август куни Cobalt, Lacetti, Damas, Labо автомобиллари учун шартнома бериш бошланганини эълон қилганди. Шундан кейин Uzavtosavdo онлайн платформасида носозликлар кузатила бошлади. 5 август куни тонгдан автосалонларда катта навбатлар ва тиқилинч юзага келди. Компания берган хабарда 4—5 август кунлари 50 мингтадан ортиқ автомобилга шартнома тузилган.
Яна бир қизиқ хабар шуки, юқоридаги автомобиллар учун олган шартномасини OLX сайти орқали сотаётган “тадбиркорлар” пайдо бўлди. Сайтни кузатсангиз, “шартнома сотаман”, деган юзлаб шундай таклифлар борлиги кўринади. Шартнома эгалари уни олиб берганлари учун хизмат ҳақи сифатида машина тўловидан ташқари, 250 доллардан 2000 долларгача сўрамоқда.
“Дарё” мухбири сайт орқали Cobalt учун шартнома сотувини эълон қилган фуқаролардан бири билан суҳбатлашди. У шартномани бериш эвазига 25 миллион сўм устама сўради. Бир оз савдолашгач, “майли, сизга охирги нархи 1500 доллар”, деди у.
“Машина келаси йил февралда, менинг номимга чиқади. Автомобилни олганимиздан кейин нотариусдан номингизга ўтказиб олаверасиз. Шартнома нархининг 1500 доллардан ками йўқ. Cobalt нархи 134 миллион 711 минг сўм. Жума кунигача шундан 50 фоизини тўлаш керак. Машина пулини кассага тўлайсиз. Агар менга ишонмасангиз, нотариусдан қарз шартномаси тузиб қўямиз. Ёки ўзим тўлов қилиб, машинани олиб чиқаман. Лекин унда машина қимматга тушади. Харажатларни ўзим қилсам, автомобиль чиққандан кейин нархини 14 минг доллар дейишим ҳам мумкин”, — деди у.
Шунингдек, “Дарё” мухбири ҳолат юзасидан Узавтосаноат вакили билан ҳам боғланди. Манбага кўра, олинган шартномани бошқа шахс номига ўтказиб бўлмайди.
“Бу энг катта риск. Эртага шартномани олиб берган одам қочиб кетса, пул тўлаганлар нима қилишади? Иккинчидан, агар харидор бир йил ичида бир хил автомобиль модели учун иккитадан ортиқ шартномага эга бўлса, товарни якуний етказиб бериш муддати кўрсатилган етказиб бериш санасидан бошлаб қўшимча 120 кунгача узайтирилиши мумкин. Яъни ўзининг номига иккитадан кўп шартнома олганлар навбатнинг охирига тушиб қолади. Ҳозирча сотиб олинадиган машиналар сонига аниқ чеклов ўрнатилмаган. Айтайлик, 5 та автомобиль харид қилмоқчисиз, улардан биринчисини вақтида оласиз. Қолганларини етказиб бериш муддати 120 кунгача узайиши мумкин”, — деди компания вакили.
Эслатиб ўтамиз, UzAuto Motors Lacetti, Cobalt ва Damas учун шартнома беришни 2022 йил декабрь ойи бошида тўхтатган эди. Орадан 8 ой ўтиб очилган контрактация бир сутка ичида ёпилди.
Изоҳ (0)