Тошкент шаҳрида жуда кўп миқдордаги ноқонуний топилган маблағларни легаллаштириш ҳолатлари аниқланди, деб хабар беради Бош прокуратура ҳузуридаги департамент.
Бош прокуратура ҳузуридаги департаментнинг Тошкент шаҳар бошқармаси томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширувлар ўтказилган. Текширувда фуқаро У.П. ва бошқалар 2022 йилда “И.А.” ва “А.А.” МЧЖни ташкил этиб, 188 нафар фуқарога муддатли тўлов асосида автомашина етказиб бериш бўйича лизинг шартномаси асосида жами 9,8 миллиард сўмини дастлабки тўлов сифатида қабул қилгани аниқланган. Улар шундан 138 нафар фуқарога автомашина олиб бермасдан, мижозларнинг жами 946,2 миллион сўмини пластик карталарига ўтказиб, нақдлаштириб олган.
Худди шундай, “С.Р.” МЧЖ масъул шахслари 98 нафар фуқаро билан муддатли тўлов асосида автомашина етказиб бериш бўйича тузилган лизинг шартномаси асосида жами 4,7 миллиард сўмини дастлабки тўлов сифатида қабул қилиб, шундан 1,5 миллиард сўмини МЧЖни норасмий бошқариб келган Н.Т. ва бошқаларнинг пластик карталарига ўтказиб нақдлаштирган. Шунингдек, улар 462 миллион сўмни “Р.А.” МЧЖнинг низом жамғармасини шакллантириш учун ўтказиб, жиноий йўл билан топилган даромадларини легаллаштирган.
Мазкур ҳолатлар юзасидан Жиноят кодексининг 188-1-моддаси (пул маблағларини ва (ёки) бошқа мол-мулкни жалб этишга доир ноқонуний фаолият) ва 243-моддаси (жиноий фаолиятдан олинган даромадларни легаллаштириш) билан жиноят ишлари қўзғатилиб, тергов ҳаракатлари ўтказилмоқда.
“Авто 60 ой” иши
“Авто 60 ой” МЧЖнинг мансабдор шахслари ва бошқаларга нисбатан 2019 йил 12-октябрь куни Жиноят кодексининг 188-1-моддаси 1-қисми (пул маблағларини ва (ёки) бошқа мол-мулкни жалб этишга доир ноқонуний фаолият) билан жиноят иши қўзғатилган эди.
Тергов жараёнида Ж. Баҳодиров ўзининг жиноий шериклари билан олдиндан тил бириктириб, бир гуруҳ бўлиб, “Авто 60 ой” ва Catalea Media МЧЖ ва ЯТТ “Ж.Баходиров”ни ташкил этиб, 3 ой муддат ичида Ўзбекистонда UzAuto Motors АЖ томонидан ишлаб чиқарилган автомашиналарни етказиб беришни ваъда қилиб, автомашина русумига қараб, 1 миллион сўмдан 10 миллион сўмгача бўлган миқдорда пул олиб, маблағларни қўлга киритгани аниқланган.
Жиноят иши бўйича “Авто 60 ой” МЧЖ бош офисидан олинган бухгалтерия ҳужжатларидаги маълумотлар бўйича 19 344 дан ортиқ шахслар билан шартномалар тузгани аниқланган ва ушбу шартномалар жиноят ишига қўшилган. Тергов ҳаракатлари давомида жами етказилган моддий зарар 47,7 миллиард сўм экани аниқланиб, шундан 36,8 миллиард сўм ундирилган. Суд ҳукми билан фирма масъуллари 4 йилдан 8 йилгача озодликдан маҳрум этилганди.
Изоҳ (0)