Хитой ҳукуматининг Евросиё масалалари бўйича махсус вакили, Хитойнинг Москвадаги собиқ элчиси Ли Хуэй Саудия Арабистонида Украина бўйича халқаро анжуманда иштирок этади. Бу ҳақда Reuters хабар берди.
Жиддада 5—6 август кунлари 30 дан ортиқ давлат вакилларининг учрашуви бўлиб ўтади. Россия саммитга таклиф қилинмаган.
“Саудия Арабистони подшоҳлиги таклифига биноан Хитой ҳукуматининг Евросиё масалалари бўйича махсус вакили Ли Хуэй Украина бўйича халқаро конференцияда иштирок этиш учун Жиддага боради”, — деди ТИВ матбуот котиби Ван Венбин.
Унинг қайд этишича, Пекин Украинадаги урушни сиёсий йўллар билан ҳал қилиш учун халқаро ҳамжамият билан ҳамкорлик қилишга тайёр.
Аввалроқ жаноб Ли Украина, Польша, Франция, Германия, Бельгия ва Россияга ташриф буюрган эди.
Музокаралар якунида дипломат “ҳозирги вазиятда самарали музокаралар олиб бориш учун барча томонларнинг столга ўтириши анча қийин бўлиши мумкинлигини” айтган.
Politico газетасининг хабар беришича, Саудия Арабистони Жиддадаги музокаралар натижалари ҳақида Россияни хабардор қилишни режалаштирмоқда.
Айни пайтда Саудия Арабистонида Украина бўйича ўтказилган учрашув Россия Ташқи ишлар вазирлиги томонидан “Россияга қарши коалиция тузиш”га уриниш сифатида баҳоланган.
Россия президентининг матбуот котиби Дмитрий Песков “Кремль бу учрашувни кузатиб боришини” билдирган.
Изоҳ (0)