Латиш тилидан имтиҳондан ўта олмаган 6 мингга яқин Россия фуқароси сентябрь ойида Латвия Ички ишлар вазирлигидан мамлакатни тарк этиш тўғрисида хат олади, деди фуқаролик, миграция ва ижтимоий бирлик бўйича комиссия раҳбари Ингмарс Лидака.
2022 йил август ойида Латвия Вазирлар Маҳкамаси Россия Федерацияси фуқароларига мамлакатда вақтинчалик яшаш учун рухсатномаларни фақат алоҳида ҳолларда узайтириш ва уларга давлат тилидан имтиҳон топширган тақдирдагина доимий прописка бериш тўғрисида қарор қабул қилди.
15 ёшдан кичик ва 75 ёшдан ошган Россия фуқаролари имтиҳондан озод қилинади.
“Тахминан 5-6 минг атрофидаги Россия фуқаролари Ички ишлар вазирлигидан хат олишади. Булар на имтиҳон топширишга, на вақтинчалик прописка олишга иштиёқи йўқ одамлар. Амалдаги қонунларга кўра, Фуқаролик ва миграция ишлари бошқармаси уч ой ичида мамлакатни тарк этиш тўғрисида хат юбориши керак бўлади”, — деди Лидака.
Изоҳ (0)