Италия бош вазири Жоржа Мелони Британиянинг Placebo рок гуруҳи раҳбари Брайан Молкони ҳақорат ва туҳматда айблаб, судга берди, деб ёзмоқда La Stampa газетаси.
Даъвога сабаб шуки, 10 июль куни Туринда бўлиб ўтган Placebo концертида гуруҳ солисти Молко томошабинларга италян тилида мурожаат қилиб, Мелони номига одобсиз сўзлар айтган ҳамда бош вазирни “фашист, ирқчи ва нацист” деб атаган.
Газетанинг ёзишича, Турин прокуратураси Placebo концертида жамоат тартиби бузилгани юзасидан аллақачон тергов бошлаган ва унга бош вазирнинг адвокатлари орқали етказилган аризани ҳам қўшган.
Ўнг қанот “Италия биродарлари” партиясини бошқарган Жоржа Мелони 2022 йил октябрь ойида Италия бош вазири лавозимини эгаллаган эди. У тарихда Италия бош вазири лавозимини эгаллаган биринчи аёл бўлди. Оммавий ахборот воситалари Жоржа Мелони ҳукуматини Италиянинг урушдан кейинги тарихидаги (яъни, Бенито Муссолинининг фашистик режимидан бери) ултра ўнгчилар деб атайди.
Изоҳ (0)