Italiya bosh vaziri Jorja Meloni Britaniyaning Placebo rok guruhi rahbari Brayan Molkoni haqorat va tuhmatda ayblab, sudga berdi, deb yozmoqda La Stampa gazetasi.
Daʼvoga sabab shuki, 10-iyul kuni Turinda bo‘lib o‘tgan Placebo konsertida guruh solisti Molko tomoshabinlarga italyan tilida murojaat qilib, Meloni nomiga odobsiz so‘zlar aytgan hamda bosh vazirni “fashist, irqchi va natsist” deb atagan.
Gazetaning yozishicha, Turin prokuraturasi Placebo konsertida jamoat tartibi buzilgani yuzasidan allaqachon tergov boshlagan va unga bosh vazirning advokatlari orqali yetkazilgan arizani ham qo‘shgan.
O‘ng qanot “Italiya birodarlari” partiyasini boshqargan Jorja Meloni 2022-yil oktabr oyida Italiya bosh vaziri lavozimini egallagan edi. U tarixda Italiya bosh vaziri lavozimini egallagan birinchi ayol bo‘ldi. Ommaviy axborot vositalari Jorja Meloni hukumatini Italiyaning urushdan keyingi tarixidagi (ya’ni, Benito Mussolinining fashistik rejimidan beri) ultra o‘ngchilar deb ataydi.
Izoh (0)