Колумбия ўрмонларида тўрт нафар бола топилди. Улар 40 кун олдин бир двигателли Cessna 206 самолёти ҳалокатидан омон қолган.

Болалар ҳақида мамлакат президенти Густаво Петро хабар берди.

“Бутун мамлакат учун қувончли воқеа. Колумбия ўрмонида 40 кун олдин ғойиб бўлган тўрт нафар бола тирик топилди”, — деб ёзди у Twitterъда.

Колумбия армияси омон қолганларнинг аскарлар билан тушган суратини Twitterъга жойлаштирди.

Эл Тиэмпо нашрининг ёзишича, болалар сувсизлик ва ҳашаротлар чақишидан азият чеккан. Уларни аскарлар ва маҳаллий аҳоли топиб олган.

Болалардан энг кичиги ҳалокатдан кейин бир ёшга тўлган, қолганлари 4, 9, 13 ёшда, деб ёзади Эл Тиэмпо. Самолёт бортида жами етти киши бўлган. Май ойи ўрталарида ўрмонда уч нафар катта ёшли кишиларнинг жасади топилганди.