ДХХ олтин қазиб олиш учун шароит яратиб бериш эвазига фуқародан 30 минг доллар талаб қилган Навоий вилояти Томди тумани ички ишлар бўлими профилактика инспекторини қўлга олди.
Маълум қилинишича, у давлат захирасига олинган ҳудудда таркибида олтин бўлган руда қазиб олиш учун шароит яратиб, ҳуқуқ-тартибот идоралари томонидан бўладиган рейд тадбирларидан огоҳлантириб туриш эвазига маҳаллий фуқародан 30 минг доллар талаб қилиб, 15 минг долларини олган вақтида ушланди.
Бухоро вилояти Когон тумани ички ишлар бўлими ходими фуқарога нисбатан ички ишлар органларига келиб тушган аризани ўзининг ваколатли ҳамкасблари орқали унинг фойдасига ижобий ҳал қилиб бериш эвазига 1300 доллар олган вақтида ДХХ ва Бош прокуратура ҳузуридаги департамент ходимлари томонидан ушланди.
Ҳозирда ушбу ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)