Ички ишлар вазирлиги “Жиноят ишини юритиш чоғида қамоқда сақлаш тўғрисида”ги қонунга қўшимча киритишга оид қонун лойиҳани муҳокамага қўйди.
Қонуннинг 3-боби 27-1-модда билан тўлдирилади. У қамоққа олиш тарзидаги эҳтиёт чораси қўлланилган ушлаб турилганларни мажбурий тиббий кўрикдан ўтказиш билан боғлиқ.
Ўзига нисбатан қамоққа олиш тарзидаги эҳтиёт чораси қўлланилиши тўғрисида суднинг ажрими қабул қилинган шахс тергов ҳибсхонасига жойлаштирилишидан олдин давлат соғлиқни сақлаш муассасасида унда қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турлари қўлланилгани натижасида олинган жароҳатларни, шикастланишларни ва яраларни аниқлаш мақсадида мажбурий тиббий кўрикдан ўтказилади.
Қамоққа олиш тарзидаги эҳтиёт чораси қўлланилган шахсни давлат соғлиқни сақлаш муассасасида мажбурий тиббий кўрикдан ўтказиш учун суднинг ушлаб турилган шахсга қамоққа олиш тарзидаги эҳтиёт чорасини қўллаш тўғрисидаги ажримида ушбу шахсни мажбурий тиббий кўрикдан ўтказиш тўғрисидаги топшириғи асос бўлади.
Қамоққа олиш тарзидаги эҳтиёт чораси қўлланилган шахсни давлат соғлиқни сақлаш муассасасига мажбурий тиббий кўрикдан ўтказиш учун етказиш қўриқлов остида амалга оширилади.
Қамоққа олиш тарзидаги эҳтиёт чораси қўлланилган шахсни давлат соғлиқни сақлаш муассасасида мажбурий тиббий кўрикдан ўтказиш уни қўриқлаётган (конвой қилаётган) ҳуқуқни муҳофаза қилувчи орган ходимлари (ҳарбий хизматчилари) ҳамда мажбурий тиббий кўрикдан ўтказилаётган шахснинг адвокати иштирокида амалга оширилади.
Давлат соғлиқни сақлаш органларининг мажбурий тиббий кўрикдан ўтказишни амалга оширишга рухсат берилган тиббиёт муассасалари рўйхати, тиббий кўрикдан ўтказиш тартиби ва тиббий текширув натижаларига доир хулосанинг шакли Соғлиқни сақлаш вазирлиги томонидан Олий Мажлиснинг Инсон ҳуқуқлари бўйича вакили (омбудсман) билан келишилган ҳолда белгиланади.
Мажбурий тиббий кўрикдан ўтказишни амалга оширишга рухсат берилган тиббиёт муассасаларида мажбурий тиббий кўрикдан ўтказиш жойи, шунингдек, мажбурий тиббий кўрикдан ўтказиладиган шахсни қўриқлаш тартиби Ички ишлар вазирлиги ва Соғлиқни сақлаш вазирлиги томонидан Давлат хавфсизлиги хизмати ва Олий Мажлиснинг Инсон ҳуқуқлари бўйича вакили (омбудсман) билан келишилган ҳолда белгиланади.
Мажбурий тиббий кўрик тиббиёт муассасаси томонидан суднинг ушлаб турилган шахсга қамоққа олиш тарзидаги эҳтиёт чорасини қўллаш тўғрисидаги ажрими ва унда кўрсатилган шахснинг шахсини тасдиқловчи (идентификацияловчи ID-картаси, паспорти ёки шахсни тасдиқловчи бошқа) ҳужжати асосида ўтказилади.
Мажбурий тиббий кўрик тиббиёт муассасалари томонидан суднинг ушлаб турилган шахсни қамоққа олиш тарзидаги эҳтиёт чорасини қўллаш тўғрисидаги ажрими тиббиёт муассасаси маъмуриятига тақдим этилган пайтдан эътиборан бир соатлик муддат ичида ўтказилади.
Мажбурий тиббий кўрик давомида шахсда жароҳатлар, шикастланишлар ва яралар мавжудлиги ёки мавжуд эмаслиги текширилади ҳамда мажбурий рентгенофлюрографик текширувидан ўтказилади.
Мажбурий тиббий кўрик натижалари қайд этилган тиббий хулоса тиббий кўрикни ўтказишда иштирок этган шифокор ва мутахассислар томонидан уч нусхада тўлдирилиб, уларнинг имзолари ва тиббиёт муассасасининг муҳри билан тасдиқланади.
Мажбурий тиббий кўрик давомида шахснинг танасида жароҳатлар, шикастланишлар ва яралар аниқланган тақдирда улар белгиланган тартибда қайд этилади ва мажбурий тиббий кўрикдан ўтган шахсга ва унинг адвокатига маълум қилинади, шунингдек, зудлик билан назорат қилувчи прокуратура органларига ҳамда Олий Мажлисининг Инсон ҳуқуқлари бўйича вакилига (омбудсманга) ёки унинг минтақавий вакилига хабар берилади.
Мажбурий тиббий кўрик давомида шахснинг танасида аниқланган жароҳатлар, шикастланишлар ва яралар юзасидан прокуратура органлари томонидан терговга қадар текширув ҳаракатлари ўтказилади.
Мажбурий тиббий кўрик натижалари бўйича тиббий хулосанинг бир нусхаси мажбурий тиббий кўрикдан ўтказилган шахснинг йиғма жилдига тикилади, бир нусхаси мажбурий тиббий кўрикдан ўтказилган шахснинг адвокатига берилади, бир нусхаси эса тиббиёт муассасасида қолади.
Мажбурий тиббий кўрикдан ўтказилган шахс тергов ҳибсхонасига топширилади.
Мажбурий тиббий кўрикдан ўтказилганини тасдиқловчи тиббий хулосаси бўлган шахсни тергов ҳибсхонасига қабул қилишда бошқа тиббий ҳужжатларни талаб қилиш ёки қўшимча тиббий текширувларни ўтказишни талаб қилишга йўл қўйилмайди.
Мажбурий тиббий кўрикдан ўтказиш тартиби қамоққа олиш тарзидаги эҳтиёт чораси қўлланилган ушланган қидирувда юрган шахсларга ҳам амал қилади.
Қамоққа олиш тарзидаги эҳтиёт чораси қўлланилиб, белгиланган тартибда мажбурий тиббий кўрикдан ўтказилган ҳолда ҳибсхонага жойлаштирилган шахслар бир муассасадан бошқа муассасага кўчирилганида ёки процессуал ҳаракатларга олиб чиқилиб муассасага қайтарилганида уларни тиббий кўрикдан ўтказиш ушбу шахсни қабул қилиб олаётган муассасаларнинг тиббиёт ходимлари томонидан ички тартиб қоидаларида белгиланган тартибда амалга оширилади.
Изоҳ (0)