Олмалиқ кон-металлургия комбианти раҳбарияти томонидан бир қатор хориж давлатларининг муҳандислар тайёрлаш марказлари фаолиятини ўрганган ҳолда ҳамда комбинатнинг кадрларга бўлган эҳтиёжидан келиб чиқиб замонавий муҳандислик мактаби ташкил этилмоқда.
Мазкур мактаб биносини қуриш учун Олмалиқ шаҳар Мирзо Улуғбек кўчаси ҳудудидан 1,5 гектар ер майдони ажратиб берилди ва айни пайтда қурилиш ишлари жадал суръатларда олиб борилмоқда.
Муҳандислик мактабида геология, маркшейдерлик иши, кончилик иши, бойитиш, металлургия, механика, энергетика, кон саноати транспортлари, автоматлаштириш каби таълим йўналишлари бўйича тингловчилар ўқитилади.
Машғулотларда давомида тингловчилар “Серпо Минерал Systemс”, “Тҳйссенкрупп”, “Мецо Оутотеc”, “УЗТМ-Картекс”, “БелАЗ” каби дунёнинг етакчи компанияларининг технологияларини ўрганишади.
Назарий таълим янги педагогик технологиялар асосида амалиётга ёндашган ҳолда ташкил этилади. Муҳандислик мактабида мутахассислар 6-10 ой муддатда қайта тайёрланади. Бир ўқув курсига 160 нафар тингловчилар қабул қилиш режалаштирилган.
Яна бир аҳамиятли жиҳати шундаки, мазкур мактабда тингловчиларга дарсларни дунёнинг саноати ривожланган давлатлари олимлари ва ўқитувчилари ўтишади.
Муҳандислик мактаби Германиянинг, хусусан, “Аурубис АГ” компанияси тренинг маркази намунаси асосида ташкил этилаяпти.
Ҳозирда мактабда ўқитиш учун 2020-2022 йилларда кон-металлургия йўналишида бакалаврни тамомлаган, ўз соҳаси бўйича ишламаётган ёшлар рўйхати шакллантирилмоқда.
Мактабга Финляндия, Канада, Россия, Беларусь, Германия, Жанубий Корея, Хитой, АҚШ каби давлатлардан кон-металлургия, геология, саноат, маркшейдерлик йўналишларда мутахассислар жалб этилиши кўзда тутилган.
Маълумот ўрнида: ОКМК ва Германиянинг Фрайберг техника университети Кончилик академияси билан ўзаро меморандум имзоланган. Мазкур ҳамкорлик доирасида шу кунларда академиянинг Тоғ-кон институтининг директори, профессор Карстен Дребенштедт бошчилигида делегация комбинатда бўлиб турибди.
Делегация таркибидаги талабалар комбинат корхоналарида ўқув амалиётини ўташмоқда.
- Талабаларга назарий билимлардан ташқари амалиёт ҳам ўта муҳим ҳисобланади, Айниқса, тоғ-кон йўналишида. Чунки, дунёдаги барча конлар бир биридан фарқ қилади. Геология соҳасида ҳам янгиликлар кўп.
Бизнинг талабаларимиз ҳар бир конни ўрганиб фарқлай олишини хоҳлаймиз, бунинг ортидан уларнинг билим, малака ва тажрибалари ортади. Шу ўринда айтиб ўтишим керакки биз бирор конни танлашдан олидин талабаларга у ерда яшаш ва илм олишларига шароит яратиб бера оладиган мамлакатни танлаймиз. Ўзим ҳам бир вақтлар талаба бўлганман ва 1980 йил Ангрендаги конларда амалиёт ўтаганман. Ўша даврда ҳам барча имкониятларни ҳозирлаб беришган эди.
Яна бир жиҳат Европада бу каби конлар йўқ, мисол учун Германиянинг ўзида Қалмоққир конида ишлаётган катта ҳажмидаги автосомасваллар ва экскаваторларни топиш қийин. Шунинг учун ҳам Ўзбекистонни танладик.
Бугунги кунда давлатингиз ривожланиб бораябти. Бу жуда қувонарли албатта, ҳар бир соҳада янгиликлар бисёр. Мисга бўлган талаб дунёда кундан кунга ошиб бормоқда. Комбинатнинг истиқболли лоийҳалари эса мис металлини ҳажмини оширишга қаратилган. Бу жуда тўғри ва зарур танлов. Ўйлайманки, яқин келажакда мамлакатингиз бунданда юқори марраларни эгаллайди, - дейди Карстен Дребенштедт.
ОКМК ва Фрайберг академияси ҳамкорлиги доирасида ҳозирда олийгоҳнинг докторантурасида икки нафар комбинат мутахассислари таҳсил олишмоқда. Комбинатнинг умидли ёшларидан бири бўлган Ўктам Норенов бу хақда ўз фикр мулоҳазаларини билдириб ўтди.
- ОКМК ва академия ўртасида имзоланган меморандум асосида ҳозирда Техника университетининг докторантурасида ўқияпман. Ўқиш жараёнида кончилик соҳасини янги технологияларни ўрганиш асосида илмий изланишлар олиб бораяпман. Ўзаро тажриба алмашиш асносида биз улардан янги замонавий технологияларни ўзлаштириш имкониятига эга бўлсак, Германиялик талабалар комбинатда қазиб олишдан тортиб тайёр маҳсулотгача бўлган жараённи ўрганиш имконига эга бўлишмоқда.
Ҳар қандай соҳа ривожи замонавий технология, илғор ишлаб чиқариш тизими, халқаро алоқалар каби муҳим омилларга боғлиқ бўлса-да, билимли, малакали, жаҳон стандартлари талабларига жавоб берадиган мутахассислар бунда асосий ўрин эгаллайди. Шу боис, ОКМКда бугун ана шундай иқтидорларни тайёрлаш устувор вазифа сифатида белгиланган.
ОКМК ахборот хизмати
Реклама ҳуқуқи асосида.
Изоҳ (0)