Россия ҳарбийлари Донецк вилоятининг Константиновка шаҳрини “Смерч” ёппасига ўт очувчи реактив тизимлардан кассетали бомбалар билан ўққа тутди. Бу ҳақда Донецк вилояти маъмурияти раҳбари Павел Кириленко маълум қилди.
Константиновка шаҳар маъмурияти маълумотларига кўра, 10 ёшли болакай ҳалок бўлган, етти киши, жумладан, тўрт нафар бола жароҳатланган, деб хабар берди Украинанинг “Суспильне” телеканали. Жароҳатланган болалар орасида икки опа-сингил бор, улардан бирининг аҳволи оғир, дейилади прокуратура хабарида.
Донецк вилояти прокуратураси матбуот котиби Анастасия Медведеванинг айтишича, отишма вақтида Константиновка аҳолиси маҳаллий сув омборларидан биридаги дам олиш масканида бўлган.
Human Rights Watch ҳуқуқ фаоллари айтганидек, Украинадаги жанговар ҳаракатлар пайтида кассетали ўқлардан Россия ҳарбийлари ҳам, украиналиклар ҳам фойдаланиб келмоқда. Кўплаб видеолавҳалар 2022 йил 24 февралдан бери Украинадаги можаронинг ҳар икки томони Совет ва Россияда ишлаб чиқарилган турли кассетали ўқ-дорилардан фойдаланганини тасдиқлайди.
Июль ойида АҚШ Украинага янги ҳарбий ёрдам пакетини эълон қилди, бу пакет кассетали бомбаларни ҳам ўз ичига олади. Бунга жавобан Россия мудофаа вазири Сергей Шойгу ҳозирча Россия Украинада кассетали ўқ-дорилар ишлатмаганини, бироқ Украина қўшинлари улардан фойдаланса, улар ҳам фойдаланишга тайёрлигини маълум қилди. Буни Россия президенти Владимир Путин ҳам таъкидлади.
Изоҳ (0)