Қозоғистон Республикасининг “Хабар-24” информацион таҳлилий каналининг берган маълумотига кўра Қизилўрда вилоятининг Жанакўрғон туманида 77 ёшли, Шиели туманида 51 ёшли фуқаролар оғир ҳолатда Қрим-Конго геморрагик иситма (ҚКГИ) касаллиги белгилари билан шифохонага олиб келинган. Беморлар реанимация бўлимида вафот этган.
Манбага кўра, вилоятда йил бошидан қана чақиши билан 600 нафар фуқаро тиббиёт муассасаларига мурожаат қилган, шундан 23 нафари шифохонага ётқизилган. Шифохонага ётқизилган беморларнинг 8 нафарида ҚКГИ касаллиги тасдиқланган. Ҳозирги кунда табиий ўчоқли ҳудудларда ўта хавфли юқумли касалликларни келтириб чиқарувчи бўғимоёқлилар (кана, бурга, пашша ва ҳ.к) эпидемиясига қарши тадбирлар олиб борилмоқда.
Маълумот учун, ҚКГИ – арбовирус қўзғатадиган, иситмалаш, геморрагик аломатлар билан кечадиган, табиий шароитда трансмиссив йўл билан юқадиган, табиий ўчоқли ўта хавфли юқумли касаллик. Касаллик одамларга кана чақиши оқибатида юқади. ҚКГИ касаллиги спорадик тарзда тарқалади.
Санитария-эпидемиологик осойишталик ва жамоат саломатлиги қўмитаси ахборот хизматининг таъкидлашича, Республика ҳудудига карантин ва ўта хавфли юқумли касалликларни чет давлатлардан кириб келиши ва аҳоли ўртасида тарқалиб кетишига йўл қўйилмади.
“Республика бўйича бугунги кунда, касалликларнинг четдан кириб келишини олдини олиш мақсадида: давлат чегараларини кесишиш жойларида, халқаро аэропортларда, темирйўл вокзалларида ва Термиз дарё портида ташкил этилган 51 та санитария карантин пунктлари (СКП) фаолият олиб бормоқда.
Ўзбекистон Республикаси Санитария-эпидемиологик осойишталик ва жамоат саломатлиги қўмитасининг тавсиясига кўра жорий йилнинг апрель—май ойларида барча маъмурий ҳудудларда эпидемияга қарши курашиш фавқулодда комиссиясининг (ЭҚКФК) навбатдаги йиғилишлари ўтказилди. Бунда, ҚКГИ касаллигига қарши амалга оширилиши зарур бўлган чора-тадбирлар муҳокама этилиб, соғлиқни сақлаш, Санэпидқўмитанинг ҳудудий бошқармалари ва ветеринария хизматлари ҳамда мутасадди ташкилотлар билан ҳамкорликда чора-тадбирлар белгилаб олинди.
ҚКГИ қўзғатувчилари билан зарарланган каналар мавжуд ҳудудларни аниқлаш ва каналарда зарарланиш даражасини ўрганиш мақсадида ветеринария хизмати билан ҳамкорликда табиий ўчоқли ҳудудлардан 1 000 донадан кана йиғиб олиниб, Вирусология ИТИ лабораториясида таҳлилдан ўтказилиб, ҚКГИ касаллигининг келгуси йил учун башорати, маъмурий ҳудудлар кесимида тайёрланди.
Қорақалпоғистон Республикаси, Навоий, Бухоро, Қашқадарё, Сурхондарё, Жиззах ва Сирдарё вилоятларидаги тегишли муассасаларда Қрим-Конго геморрагик иситмаси билан касалланиб тузалганларнинг (донорларнинг) 14 литр қон плазмаси захираси яратилди. Бу эса Қрим-Конго геморрагик иситма касаллиги аниқланганда, касалликнинг оғир асоратларини олдини олишга замин яратади”, – дейилади қўмита ахборотида.
Қўшимча қилинишича, ҚКГИ касаллиги бўйича табиий ўчоқли ҳудудлар аҳолиси ўртасида ҚКГИ касаллигининг олдини олиш бўйича кенг қамровли санитария-тарғибот ишлари олиб борилмоқда. Хусусан, март ойида Ўзбекистон Республикаси Фавқулодда вазиятлар вазирлиги билан ҳамкорликда 14 та маъмурий ҳудудда махсус–тактик ўқув машғулотлари ўтказилди.
Изоҳ (0)