Фарғона вилояти ИИБ ижтимоий тармоқларда тарқалган ўзини ИИО ходими деб таништирган қиз ҳақидаги хабарга расмий муносабат билдирди.
Маълум қилинишича, ҳолат Фарғона вилояти ИИБ томонидан ўрганиб чиқилган. Ўрганишлар давомида аниқланишича, ички ишлар органи ходимининг хизмат кийимидаги қиз Фарғона вилояти Қува туманида яшовчи 21 ёшли Ш.М. экани маълум бўлган ва унга нисбатан туман ИИБ томонидан тегишли тартибда ҳужжатлар расмийлаштирилган.
Жиноят ишлари бўйича Қува туман суди томонидан Ш.М.га 21 июль куни Маъмурий жавобгарлик тўғрисидаги кодекснинг 209-моддаси прим 1-моддасига (Вазирликлар, идоралар ва ташкилотлар ходимларининг формали кийим-бошини қонунга хилоф равишда кийиб юриш) асосан базавий ҳисоблашнинг икки баравари миқдорида (660 минг сўм) жарима жазоси қўлланилган.
Шунингдек, мазкур кийим-бошни Ш.М.га берган ходимнинг хатти-ҳаракатлари юзасидан хизмат текшируви тайинланган.
Март охирларида Жиззахда икки нафар вайнер ЙПХ ходимлари ҳақидаги ҳажвий видеоси учун ҳуқуқбузар деб топилиб, уларга нисбатан 15 ва 10 сутка қамоқ жазоси тайинланганди. Кейинроқ суд қарори ноқонуний бўлгани сабабли Ғаллаорол туман прокуратураси томонидан уни бекор қилиш юзасидан апелляция тартибида протест келтирилган. Протестга асосан маъмурий иш судлов ҳайъати апелляция инстанциясида кўриб чиқилиб, У.Ў. ва бошқаларнинг ҳаракатларида ҳуқуқбузарлик аломатлари мавжуд эмас деб топилган эди.
Изоҳ (0)