Ҳар бир инсон музқаймоқни яхши кўради, лекин буви ёки бобонгизга қўшимча порсия таклиф қилишга шошилманг — шифокорлар кекса одамларни муздек егуликларни истеъмол қилишда эҳтиёткорликка чақирадилар.
Совуқ овқатлар организмда одатдагидек сўрилмайди, чунки улар овқат ҳазм қилиш тизимини зўриқиш билан ишлашга мажбур қилади. Кексаликда бу ҳар қандай гастроэнтерологик патологиянинг кучайишига олиб келиши мумкин. Шунинг учун ошқозон-ичак тракти касалликлари (айниқса, ўт-тош касаллиги ва сурункали панкреатит) билан оғриган 60 ёшдан ошган одамлар учун музқаймоқ тўғридан тўғри мумкин эмас.
Бу ҳақда Россия Миллий тадқиқот тиббиёт университетининг Геронтологик илмий-клиник маркази гастроэнтерологи тиббиёт фанлари доктори, профессор Антонина Машарова маълум қилди.
Шифокорнинг сўзларига кўра, кўп миқдорда музқаймоқ истеъмол қилиш юрак-қон томир тизими касалликларининг пайдо бўлишига ёки кекса эркаклар ва аёлларда мавжуд юрак патологияларининг ёмонлашувига олиб келиши мумкин. Бунинг сабаби шундаки, кўпчилик томонидан севиб истеъмол қилинадиган тетиклантирувчи таомнинг таркиби юрак мушакларига зарарли бўлган кўп миқдордаги тўйинган ёғларни ўз ичига олади. Нафақахўрлар томонидан танланадиган арзон музқаймоққа кўпинча сут ёғи ўрнини босувчи моддалар қўшимча равишда ишлатилади.
Бундан ташқари, музқаймоқ таркибида жуда кўп шакар мавжуд бўлиб, бу ички микро-яллиғланишни келтириб чиқаради — кекса одамларнинг асаб тизими ва мияси тез ҳазм бўлувчи углеводларга таъсирчан. Профессор Машарова шакарни ортиқча истеъмол қилиш пенсия ёшидаги одамларда хотирани сусайтириши, реакция ва идрок тезлигига таъсир қилишини исботловчи замонавий тадқиқотларга ишора қилади.
Бундан ташқари, шакар ва ёғлар кўп бўлган озиқ-овқатларни истеъмол қилиш вазн ортишига, ичак микробиотасининг ўзгаришига ва ошқозон-ичак трактининг бузилишига олиб келади, айниқса, кексаликда намоён бўладиган иммунитет тизими фаолиятига салбий таъсир қилади.
Шифокор таъкидлаганидек, баъзида буви ва бобонгизни ёзнинг иссиқ кунида музқаймоқ билан хурсанд қилишингиз мумкин — унутманг: фақат гоҳ-гоҳида ва ширинлик кичик бўлакдан иборат бўлсин!
Изоҳ (0)