Агар кимдир кечаси бир неча марта терга ботган ҳолда уйғонса, унда ушбу патологиянинг асосий сабабларини излаш керак. Одатда, бу жиддий муаммонинг аломати бўлиши мумкин, деб ёзади Wday нашри.
Уйқу пайтида кучли терлашнинг сабаблари
Менопауза
Менопаузанинг ўртача ёши тахминан 51 ёш ҳисобланади. Бу даволанишни талаб қилмайдиган, организмнинг нормал ҳолати. Баъзида менопауза даври бошланади. Мисол учун аёлларнинг 1 фоизи 40 ёшида бу ҳолатга дуч келишади. Қандай бўлмасин бу даврда сиз тананинг физиологик қайта тузилишига тайёр бўлишингиз керак.
Гормонларнинг беқарорлиги туфайли менопауза кўплаб нохуш аломатларга олиб келиши мумкин. Эстроген ва прогестероннинг камайиши нафақат кайфиятнинг ўзгаришига, балки метаболизмнинг секинлашиши, соч толаларининг ингичкалашиши ва бошқа ўзгаришларга ҳам сабаб бўлади. Натижада пайдо бўлган иситма ва титроқ кечаси терлашга олиб келади. Ушбу даврда аҳволни енгиллаштирадиган гормон терапиясини буюриши учун шифокор билан маслаҳатлашинг.
Асабийлашиш
Ишдаги ташвишлар, яқинларингиздан хавотирланиш, бошқариб бўлмайдиган қўрқувлар бир қатор салбий аломатларга олиб келиши мумкин: мушаклар зўриқиши, юрак уришининг тезлашиши, нафас олиш ва ошқозон муаммолари (кўнгил айниши, диарея), шунингдек, терлаш каби.
Доимо тунда тердан уйғониб кетсангиз, сўнг узоқ вақт ухлай олмасангиз, ташвишланиш сабабларини ва асабийлашиш даражасини аниқлай оладиган мутахассисга мурожаат қилишингиз керак. Ундан сиз турмуш тарзини ўзгартириш бўйича тавсиялар оласиз ва у антидепрессантларни қабул қилиш орқали терапия курсини белгилайди.
Гипергидроз
Ҳаддан ташқари терлашнинг икки тури мавжуд: умумий ва маҳаллий. Умумий тананинг катта жойларида ўзини намоён қилади ва алоҳида қисмларда локализация қилинади: кафтлар, оёқ таглари, пешона ва қўлтиқ остида. Гипергидроз нафақат ҳаддан ташқари иссиқлик, жисмоний машқлар, ҳиссий стресс, балки бир қатор касалликлар ва айрим дориларнинг таъсири билан ҳам кузатилади. Гипергидрознинг сабаби ноаниқ бўлса, мутахассисга мурожаат қилиш керак. Кун давомида оёқ ва танадан ёқимсиз ҳид тарқалиши ёқимсиз ҳолатдир. Кечаси чойшабларни бир неча марта ўзгартиришга тўғри келади.
Дори-дармонлар қабул қилиш
Баъзи дорилар ножўя таъсир сифатида тунда терлашни келтириб чиқариши мумкин. Агар сиз яқинда қабул қилган дори ортиқча терлашингизга сабаб бўлганига шубҳа қилсангиз, шифокорга мурожаат қилишингиз ва муқобил даволаш усуллари мавжудлигини билиб олишингиз лозим. Ҳар қандай ҳолатда ҳам тажриба қилманг ва шифокор сизга узоқ вақт давомида буюрган нарсаларни ичишни тўхтатманг. Баъзи дори-дармонларни тўсатдан тўхтатиш тескари натижа бериши мумкин. Бу ҳолда маълум нейромедиаторларнинг даражаси кескин пасаяди ва бош айланиши, уйқусизлик, асабийлашиш ва бош оғриғи каби белгилар пайдо бўлади. Ягона вариант — шифокор кўригидан ўтиш.
Иситма
Ҳароратнинг вақтинча кўтарилиши, одатда, организмнинг қандайдир инфекцияга қарши курашаётганини кўрсатади. Соғлом ҳолатда инсон организмининг ҳарорати тахминан 36,6 даражани ташкил қилади. Ҳарорат ошиши билан иситма ёки титроқ пайдо бўлади. Кўпинча бу ҳолат бош оғриғи, заифлик ва албатта, кеча-ю кундуз терлаш билан бирга келади. Аниқ сабабини топиш мақсадида бактериал ва вирусли инфекциялар учун тестдан ўтинг.
Гипертиреоз
Бу қалқонсимон без томонидан тироксин гормонининг организмга кўп чиқариладиган синдром. Бунда қуйидаги аломатлар юзага келади:
- вазн йўқотиш (иштаҳанинг яхши экани ва етарли миқдорда озиқ-овқат истеъмол қилинишига қарамай);
- юракнинг тез уриши;
- терлашнинг кучайиши;
- тери намланиши;
- сочларнинг ингичкалашиши;
- ошқозон-ичак тракти ва асаб тизими фаолияти билан боғлиқ муаммолар.
Тегишли даволаниш ва парҳез бўйича маслаҳат олиш учун шифокорга мурожаат қилинг. Аччиқ чой, қаҳва, шоколад, зираворлардан воз кечишингиз, сут ичишингиз ва кўпроқ сабзавот, меваларни истеъмол қилишингиз керак бўлади.
Уйқу апнеси
Обструктив уйқу апнеси синдроми (ОУАС) — нафас олишнинг 15 сониягача ёки ундан кўпроқ вақт давомида такрорланиш билан тўхтаб қолиши, хуррак отиш, тунги уйғониш ва уйқу етишмаслиги билан бирга келади. Бу хотиранинг йўқолишига, кундузги уйқучанликка, доимий чарчоққа ва тахмин қилганингиздек, терлашга олиб келиши мумкин. Бу жиддий ҳолат бўлиб, даволанишни талаб қилади. Ортиқча вазнга эга бўлсангиз, овқатланиш тартибини мувозанатлаштириш, ухлаш ҳолатини ўзгартириш (чалқанча ухламаслик тавсия қилинади), спиртли ичимликлар, уйқу таблеткаларидан воз кечиш ва томоқ мушакларини машқ қилдиришдан иборат бўлади. Ҳар ҳолда, маслаҳат учун мутахассисга учраш керак.
Бруцеллёз
Ушбу бактериал инфекция Малта иситмаси деб ҳам аталади. Одамлар уни ҳайвонлардан ёки пастеризацияланмаган сут маҳсулотлари орқали юқтириб олади. Бруцеллёз белгиларига қуйидагилар киради:
- иситма;
- титроқ;
- терлаш;
- заифлик;
- чарчоқ;
- иштаҳа йўқолиши;
- бош оғриғи;
- мушак ва бел оғриғи.
Тажрибали шифокор биринчи текширувдаёқ касалликни осонгина аниқлай олади ва керакли антибиотикларни буюради.
Роматоид артрит каби аутоиммун касалликлар
Роматоид артрит — бу агрессив антитаначаларнинг фаол тўпланиши билан тавсифланган аутоиммун касаллик бўлиб, артикуляр ва бириктирувчи тўқима тузилмаларининг ҳалок бўлишига олиб келади. Юқорида иситмага олиб келиши мумкин бўлган бактериал ва вирусли касалликлар сабабли тунги терлаш ҳолатлари кўриб чиқилди. Аммо ҳароратнинг ўзгариши роматоид артритдан ҳам пайдо бўлиши мумкин. Ушбу синдром иммунитет тизимининг бўғимларни қоплайдиган синовиал мембрана билан нотўғри курашидан келиб чиқади. Бу ҳолда оёқ-қўлларнинг қаттиқлиги ва ёқимсиз оғриқ ҳиссиётлари пайдо бўлади. Шифокор бўғимларингизни сақлаб қолиш учун физиотерапия ёки жарроҳлик амалиётини тавсия қилади.
Қандли диабет
Тунги гипергидроз қондаги глюкоза концентрациясининг пасайиши туфайли юзага келади. Бу гормонлар чиқарилишига жавобан асаб тизимининг реакцияси бўлиб даволаш фақат шифокор томонидан белгиланадиган жиддий касаллик ҳисобланади.
Эрталаб нам ҳолда уйғониш ноқулайлик туғдиради. Уйқу пайтида ортиқча терлаш хона ҳароратининг ҳаддан ташқари иссиқлиги, қалин материалдан тайёрланган тунги кийим ёки ҳаво ўтказмайдиган кўрпа туфайли бўлиши мумкин. Бундан ташқари, бу ҳодиса жиддий касалликлар белгиси бўлиши мумкин. Бунда сабабларни аниқлаш ва бошқа касалликларни истисно қилиш учун шифокор кўригидан ўтиш тавсия этилади.
Изоҳ (0)