Жанубий Африка Республикаси (ЖАР) ҳукумати Россия президенти Владимир Путиндан август ойида Йоханнесбургда ўтказилиши режалаштирилган БРИКС саммитига келмасликни, балки видеоалоқа орқали қатнашишни сўради. Бу ҳақда The Sunday Times хабар берди.
Нашр ЖАР расмийларига таяниб ёзишича, агар Путин мамлакатга келса, Жанубий Африка Республикаси Халқаро жиноий суд буйруғини бажариши ва уни ҳибсга олиши керак бўлади.
“Путин мамлакатга келса, ҳибсга олмасликнинг иложи йўқ. Агар у ташриф буюрса, уни ҳибсга олишга мажбур бўламиз”, — деди расмий.
Ўтган ҳафта Жанубий Африка Республикаси президенти Сирил Рамапоса мамлакат вице-президенти бошчилигидаги махсус ҳукумат қўмитасини тузиб, Путинни ҳибсга олишга ордер бериш билан боғлиқ вариантларни ўрганиб чиқди.
Sunday Times манбасига кўра, қўмита Путиннинг БРИКС саммитида видеоалоқа орқали иштирок этишидан бошқа вариантларни топа олмайди.
“Бизда ягона вариант — Москвадан Теамс ёки Zoom орқали уланиш”, — деди ҳукумат вакили.
Ҳозир Жанубий Африка Республикаси бу борада Россия раҳбарияти билан музокаралар олиб бормоқда.
The Sunday Times нашрининг ёзишича, ЖАР Россияга қарши санкцияларни қўллаб-қувватлашдан ёки унинг Украинадаги агрессиясини қоралашдан бош тортган.
Бироқ Халқаро жиноий суд томонидан Путинни украиналик болаларни Россия томонидан босиб олинган ҳудуддан мажбуран депортация қилиш айби билан ҳибсга олиш ордери чиқиши ЖАРдаги ҳукмрон партияни ноқулай аҳволга солиб қўйди.
ЖАР Рим статутини имзолаган давлатлар қаторига киради, бу эса уни Халқаро жиноий суд қарорларини бажаришга мажбур қилади. Ордер чиқарилгандан сўнг ЖАР Путинни ҳибсга олиш мажбуриятлари бўйича юридик маслаҳат сўради.
Аввалроқ ЖАР Халқаро жиноий суддан чиқиши ҳақида хабар тарқалганди. Кейинроқ Жанубий Африка республикаси президенти идораси ҳукмрон партия позицияси янглиш тарзда маъқуллаганини айтди.
Изоҳ (0)