Британия Мудофаа вазирлиги 3000 нафар ҳарбий бўлмаганлар иш ўрнини қисқартириб, янги амалдорларни ишга олишни вақтинча тўхтатади. Вазирлик шу йўл билан армия маошини оширишни режалаштирган. Бу ҳақда Sky News телеканали манбаларга таяниб хабар берди.
Аввалроқ Қуролли кучлар вазири Жеймс Хиппи ҳарбий бўлмаган янги ходимларни ёллаш тўхтатилгани ҳақида маълум қилганди. Sky News манбасига кўра, янги ходимларни ишга олиш бир неча ҳафтага тўхтатилади, шундан сўнг “назорат остида ишга қабул қилиш учун” қайта тикланади.
Sky News манбалари, шунингдек, телеканалга вазирлик кадрлар бюджетини 5 фоизга қисқартиришни режалаштираётганини айтди. Уларнинг сўзларига кўра, қисқартириш табиий усулда амалга оширилади – Мудофаа вазирлиги ишлаб турган ходимларни бўшатмасдан, шунчаки бўш лавозимларга янги ходимларни қабул қилмасликни режалаштирмоқда.
Расмий статистик маълумотларга кўра, Буюк Британия Мудофаа вазирлигида 60 мингга яқин ҳарбий бўлмаган ходим бор, дея қайд этди Sky News.
Шу ҳафта Буюк Британия ҳукумати ҳарбийларнинг маошлари 5 фоизга оширилишини, уларга қўшимча 1000 фунт стерлинг ҳам тўланишини эълон қилди. Буюк Британия бош вазири Риши Сунак, шунингдек, айрим идоралар ҳарбийларнинг маошларини оширишни молиялаштириш учун ўз бюджетларидан пул топишлари кераклигини айтди.
Изоҳ (0)