Россия хавфсизлик кенгаши раиси ўринбосари Дмитрий Медведев Буюк Британия собиқ бош вазири Борис Жонсоннинг Украинани ҳеч қандай шартларсиз НАТОга қабул қилиш кераклиги ҳақидаги фикрига муносабат билдирди.
Медведевнинг фикрича, Жонсон “ҳеч қандай шартларсиз руҳий касаллар шифохонасига ётқизилиши керак”.
“Бу нафақадаги аҳмоқни руҳий касаллар шифохонасига ҳеч қандай шартларсиз қабул қилиш керак. Айнан ўша ерда, ўзига ўхшаганлар орасида у қаҳрамон йигит образига кириб, учинчи жаҳон урушини бошлашни талаб қилиши мумкин бўлади”, — деб ёзди Медведев Telegramъда.
Шунингдек, у ўз постида Владимир Висоцкийнинг “Жинхонадан мактуб” қўшиғидан иқтибос келтирди.
11—12 июль кунлари Вильнюсда бўлиб ўтган икки кунлик НАТО саммити якунига кўра, Катта еттилик давлатлари Украина билан хавфсизлик соҳасида келишувларни ишлаб чиқиш бўйича декларацияни имзолади. Борис Жонсоннинг фикрича, НАТО давлатлари “кучли бўлиши” ва Украинани имкон қадар тезроқ ва ҳеч қандай шартларсиз альянсга қабул қилиши керак.
Изоҳ (0)