АҚШ Конгрессининг Вакиллар палатаси 2024-молия йили учун 886 миллиард долларлик миллий мудофаа қонунини тасдиқлади, дея хабар бермоқда The Hill.
Мудофаа бюджети лойиҳасини 219 киши қўллаб-қувватлади, 210 киши эса қарши овоз берди. Нашр қонун лойиҳасининг қабул қилинишини Вакиллар палатаси спикери Кевин Маккарти ва палатада кўпчиликни ташкил этган республикачиларнинг катта ғалабаси деб атади.
Демократлар томонидан назорат қилинадиган Сенат келаси сешанба куни ўзининг миллий мудофаа тўғрисидаги қонун лойиҳасини овозга қўйиши режалаштирилган. Кейин иккала палата якуний қонун лойиҳасини муҳокама қилади. Шундан сўнг қонун лойиҳаси АҚШ президенти Жо Байденга имзо учун олиб кирилади.
The New York Times қайд этишича, 886 миллиард долларлик бюджет лойиҳасида Хитой ва Россияга қарши туриш чора-тадбирлари, АҚШнинг Украинага кўрсатаётган ёрдамини назорат қилувчи махсус бош инспектор тайинланиши ва АҚШ ҳарбийлари сонини 5,2 фоизга ошириш кўзда тутилган.
Изоҳ (0)