Транспорт вазири Илҳом Маҳкамов “Ўзбекистон Республикаси самовий ҳудудида фуқаро ва экспериментал авиациясининг парвоз қилиш авиация қоидаларига (ЎзР АҚ-91) ўзгартиришлар киритиш ҳақида”ги буйруқни имзолади. Ҳужжат билан учувчисиз учиш аппаратларидан фойдаланиш бўйича қўшимча чора-тадбирлар белгиланди.
Буйруқ матнида ёзилишича, Вазирлар Маҳкамасининг 2022 йил 15 ноябрдаги 658-сон “Ўзбекистон Республикасида учувчисиз учадиган аппаратлардан фойдаланишни тартибга солиш бўйича қўшимча чора-тадбирлар тўғрисида”ги қарорига мувофиқ, мамлакат самовий ҳудудида фуқаро ва экспериментал авиациясининг парвоз қилиш қоидаларига ўзгартиришлар киритилади.
Учувчисиз учадиган аппарат — учувчисиз парвозни амалга оширадиган ёки тўлиқ бошқа жойдан масофадан туриб бошқариладиган ёхуд дастурлаштирилган ва парвозда тўлиқ автоном бўлган ҳаво кемаси (ҳаво кемалари моделлари ва ўйинчоқ ҳаво кемалари моделлари бундан мустасно). Учувчисиз учадиган аппарат ўзида одатда яхлит тизим сифатида фойдаланиладиган учувчисиз ва масофадан бошқариладиган ҳаво кемаларини бирлаштиради.
Ҳужжатга кўра, фуқаро авиацияси учувчисиз учадиган аппарати операторига берилган ҳуқуқий таъриф бир оз ўзгарган — учувчисиз учадиган аппаратни бевосита бошқарувчи шахс.
Буйруқ билан тегишли авиация қоидаларининг 789¹-банди қуйидаги таҳрирда баён этилади:
УУА парвозини бажариш вақтида фуқаро авиацияси учувчисиз учадиган аппарат операторида ушбу аппаратни учишга тайёрлаш ва бошқаришга оид қўлланма бўлиши шарт.
Изоҳ (0)