Россия президенти Владимир Путиннинг “Вагнер” раҳбари Евгений Пригожин билан учрашиш қарори Кремлнинг Пригожин ва унинг “Вагнер” кампаниясидаги роли ҳақидаги илгари айтган риторикасига зид. Америка Урушни ўрганиш институти (ISW) тегишли ҳисоботни эълон қилди.
Кремль ва Ғарб разведкаси расмийларининг хабар беришича, Путин Пригожин билан 29 июнь куни “Вагнер”нинг 24 июндаги қуролли исёни ортидан учрашган.
Кремль матбуот котиби Дмитрий Песков Путиннинг Пригожин ва барча “Вагнер” қўмондонлари (жами 35 киши) билан Кремлдаги учрашуви уч соат давом этганини айтган.
Песковнинг таъкидлашича, Путин “Вагнер”нинг “махсус ҳарбий операция” вақтидаги ҳаракатларини баҳолаган, қуролли исёнга ўз баҳосини берган ва қўмондонларнинг тушунтиришларини тинглаган.
Шунингдек, у “Вагнер” қўмондонларига “қўшимча ишга жойлашиш имкониятлари”ни таклиф қилган, улар эса давлат ва Путиннинг содиқ тарафдори ва аскари эканини билдирган.
Песков учрашувда Россия Мудофаа вазирлиги вакиллари иштирок этдими, деган саволга жавоб беришдан бош тортган.
Франциянинг Liberation нашри аввалроқ Ғарб разведкаси вакилларига таяниб, Пригожин ва “Вагнер” олий қўмондонлиги 1 июль куни Путин, Росгвардия раҳбари Виктор Золотов ва Россия Ташқи разведка хизмати раҳбари Сергей Наришкин билан учрашгани ҳақида хабар берган.
Liberation нашри 29 июнь куни эълон қилинган йиғилишни назарда тутяптими ёки Кремлдаги қўшимча йиғилишними, аниқ эмас.
“Путиннинг Пригожин билан учрашиш қарори Кремлнинг у ва ‘Вагнер’ роли ҳақидаги илгари айтган риторикасига зид келади. 29 июнь куни Песков Пригожиннинг қаерда экани ҳақида ҳеч қандай маълумотга эга эмаслигини билдирганди.
Путин, шунингдек, 27 июндаги нутқида ‘Konkord компаниясининг эгаси’ (Konkord Пригожиннинг умумий овқатланиш компаниясининг бош компанияси ҳисобланади) Россия армияси учун овқатланиш хизматларини кўрсатгани, Россия ҳукумати эса “Вагнер” қўшинларини тўлиқ молиялаштириб, таъминлаганини айтди.
Пригожин Konkord’нинг эгаси экани ҳисобга олинса, Путин бу баёнотида аниқ Пригожинни назарда тутган.
“Путиннинг Пригожин билан учрашуви ва “Вагнер”ни ҳукумат молиялаштирганини тан олиши Путиннинг исён ташкилотчиларини қоралашига зид келади. Эҳтимол, Кремль Пригожиннинг Россияда қонуний чораларсиз эркин ҳаракатлана олиши ҳақидаги кўплаб саволларга жавоб бериш учун мазкур учрашувни оммага эълон қилган”, — дейилади хабарда.
Кремлга алоқадор ҳарбий мухбири Путин ва Пригожин ўртасидаги учрашувни Кремлнинг Пригожинни “юмшоқлик билан” ўрнини алмаштириш ва “Вагнер”ни қайта қуришга уриниши деб таърифлади.
Изоҳ (0)