Наманган вилоятининг Чуст тумани ҳокими Бекзод Ҳамдамов номаълум суҳбатдошини тилга олиб бўлмас сўзлар билан ҳақорат қилгани эшитилган аудиоёзув тарқалди. Бу овоз Telegram’даги “Муштум” журнали расмий каналида эълон қилинган.
Ҳоким эканлиги айтилаётган овоз эгаси суҳбатдошини тилга олиб бўлмас сўзлар билан ҳақоратлаб, “нимага фронт йўқ”, деб сўрайди. Шунингдек, у ҳақоратини давом эттириб, “нимага 40 тонна ўради”, дея сўрайди.
Суҳбатдошини ҳақоратлашда давом этган овоз эгаси муаммони унга айтишмаганини билдириб, Аъзам исмли киши билан гаплашганидан сўнг, воқеа ҳақида билганини қўшимча қилган. У, шунингдек, кимнидир “алкаш” деб ҳам атаган.
Чуст тумани ҳокимлиги ахборот хизмати раҳбари Достонбек Собиров “Дарё”нинг бу ҳақдаги сўровига жавоб берар экан, овоз ҳокимнинг овозига ўхшамаётганини, қолаверса, бу монтаж бўлиши мумкинлигини айтиб, ҳоким бундай сўкиниши мумкинлигини рад этмоқда.
“Бу бўйича биз раддия ҳам берамиз”, — дейди ҳокимнинг матбуот котиби.
Аввалроқ, Сурхондарё вилоятининг Бандихон тумани прокурори Соатмурод Маҳманов ҳудуддаги маҳалла раисларини ҳақорат қилгани, тилга олиб бўлмас сўзлар билан “сийлагани”нинг аудиоси тарқалганди. МФЙ раисларини йиғиб, солиқ тушумлари бўйича ҳисобот сўраган прокурор уларнинг бирига “Эркакмисан сен ҳам? Хотинчалиш, итдан тарқалган экансан-да, бўлмаса одамнинг ишини қилардинг-да. Бор, бориб итга ўхшаб вовулла кўчада”, — деганди. Прокурор шунингдек, яна бир раисга “Итдан тарқаганмисан, одамдан тарқаганмисан?”, — дейди.
Сурхондарё вилояти прокуратураси сўконғич ҳоким ҳаракатига баҳо берар экан, овозлар ҳаққонийлиги текширилаётганини маълум қилди. Бироқ, бу текширув натижаси нима билан тугагани жамоатчиликка номаълумлигича қолди.
Наманганда ҳокимларнинг сўкиниши билан боғлиқ воқеа аввал ҳам содир бўлганди. Янги Наманган тумани ҳокими Жобир Абдуллаевнинг ижтимоий тармоқларда тарқалган сўкинган аудиоси муҳокама қилинганда вилоят ҳокими Шавкат Абдураззоқов бунга муносабат билдириб, “Ҳокимнинг бу қилиғини асло оқлаб бўлмайди. Бундай мавқедаги давлат хизматчиси аслида барчага ўрнак ва намуна бўлиши керак. Жумладан, муомала, аҳоли билан муносабат борасида ҳам. Наманганликлар фарзандларини ҳам сизлаб гапиради ахир”, — деганди.
Изоҳ (0)