ЕХҲТ Демократик институтлар ва инсон ҳуқуқлари бўйича бюроси (ДИИҲБ) кузатувчилари Ўзбекистондаги муддатидан илгари президент сайловидан сўнг дастлабки хулосаларини тақдим этиш учун 10 июль куни матбуот анжумани ўтказди, деб хабар бермоқда “Дарё” мухбири.
Миссияс раиси Урсула Гашекнинг маълум қилишича, сайлов жараёнида номзодларга эркин тарғибот олиб бориш имконияти берилган.
“Сайловда 4 нафар номзод бор эди, улардан бири аёл киши. Барча рўйхатга олинган номзодлар сайлов кампаниясини эркин тарзда олиб борди. Уларга сайловчилар билан учрашиш, керакли материаллардан фойдаланиш ва давлат томонидан молиялаштиришда тенг муносабат кўрсатилди. Бир неча йилдан буён давом этиб келаётган реформалар аёлларнинг жамият ва давлат жараёндаги иштирокини кенгайтириб келмоқда. 2016 йилдан буён парламентдаги аёллар сони сезиларли даражада ўсиб, умумий аъзоларнинг 30 фоизини ташкил этди. Сайловда ҳам гендер тенгликка эътибор берилди, аёл номзод ҳам бошқалар қатори тенг имкониятларга эга бўлди.”, — дейди Урсула Гашек.
Анжуманда таъкидланишича, ҳозирча сайлов якунлари бўйича шикоят келиб тушмаган.
“Олий суд, Бош прокуратура ва Ички ишлар вазирлиги маълумотларига кўра, ҳозирга қадар сайлов жараёни ва натижаларига доир ҳеч қандай шикоят келиб тушмаган. Бизнинг Ўзбекистондаги миссиямиз яна бир ҳафта давом этади, агар шу вақт давомида бирор шикоят пайдо бўлса, биз унга, албатта, эътибор қаратамиз ва якуний ҳисоботимизга киритамиз”, — дейди миссия раҳбари.
Урсула Гашекнинг қайд этишича, бюро ходимлари Ўзбекистондаги мингга яқин участкада кузатув ишларини олиб борган.
“Кеча, сайлов куни участкаларда овоз бериш жараёни очилишига кўрилган тайёргарлик ҳақида билиш учун биз кузатувимизни соат 08:00 дан аввалроқ бошладик. Бутун мамлакат бўйлаб жараённи кузатдик, мингга яқин участкага ташриф буюрдик ва бир вақтнинг ўзида таҳлил учун маълумотларни марказий офисимизга юбориб турдик. Тез орада барча хулосаларимиз акс этган якуний ҳисоботимизни эълон қиламиз”, — дея таъкидлади у.
Изоҳ (0)