Ўзбекистонда президент сайлови бўлиб ўтди

Бугун, 9 июль — Ўзбекистон президентининг муддатидан илгари сайлови бўлиб ўтди. Сайловда овоз бериш жараёни соат 08:00 дан 20:00 гача ўтказилди.

“Эртаб соат 08:00 да мамлакатимизда ташкил этилган 10 минг 784 та сайлов участкасида Ўзбекистон давлат мадҳияси янгради ва сайловчилар овоз беришни бошлади. Шунингдек, Ўзбекистон Республикасининг 39 та хорижий давлатдаги ваколатхоналари ҳузурида тузилган 56 та сайлов участкаси, хусусан, шарқ мамлакатларида тузилган сайлов участкалари ўз ишини бошлади”, — деди Марказий сайлов комиссияси раиси Зайниддин Низомхўжаев.

Маълум қилинишича, жорий йилнинг 28 июнидан то 5 июлигача ўтказилган муддатидан олдин овоз бериш имкониятидан 815 минг 313 нафар сайловчи фойдаланган.

Марказий сайлов комиссияси томонидан ўтказилган брифингда ички ишлар вазири ўринбосари Бекмурод Абдуллаевнинг айтишича, амалдаги қонунчиликка кўра, сайлов ўтказиш тартибини бузганлик учун жавобгарлик белгиланган.

“Участка сайлов комиссияси фаолиятига аралашиш ҳам ҳуқуқбузарлик ҳисобланади”, — деди вазир ўринбосари.

Ўтказилган брифингда Олий суд раиси ўринбосари Ҳалилилло Тўрахўжаев Президент сайлови миллий қонунчилигимиз ва умумеътироф этилган халқаро демократик тамойиллар асосида ўтказилганини маълум қилди.

Марказий сайлов комиссияси маълумотларига кўра, соат 17:00 ҳолатига, 13 млн 459 минг 677 нафар фуқаро ёки умумий овоз берувчиларнинг 69,85 фоизи сайловда овоз берди.