Тошкент шаҳар маҳаллий бюджети 2022 йилда жами 29 триллион 561 миллиард сўмни ташкил этди ва белгиланган 26 триллион 814 миллиард сўмлик прогноз 110 фоизга бажарилди. Бу ҳақдаги маълумот Халқ депутатлари Тошкент шаҳар кенгаши қарорида келтириб ўтилган.
Шаҳар Иқтисодиёт ва молия бош бошқармасининг ҳисоботига кўра, бюджет даромадлари ўтган йилнинг мос даврига нисбатан 7,6 миллиард сўмга кўп бўлган. Маҳаллий бюджетлар даромадлари 7 триллион 73 миллиард сўмни ташкил этган. Бу Тошкент шаҳар ва туманлар маҳаллий бюджетлари белгилаган 6 триллион 185 миллиард сўмлик прогноз 114 фоизга бажарилганини англатади. Бунинг натижасида бюджет ихтиёрида прогноздан ташқари 888,5 миллиард сўм қўшимча маблағ қолган.
Маҳаллий бюджетлар ихтиёрида жами 973,5 миллиард сўм маблағлар қолдирилган. Жумладан:
- Миробод туманида 9,2 миллиард сўм;
- Олмазор туманида 5 миллиард сўм;
- Юнусобод туманида 9,9 миллиард сўм;
- Мирзо Улуғбек туманида 8,9 миллиард сўм;
- Чилонзор туманида 9,4 миллиард сўм;
- Яшнобод туманида 6,3 миллиард сўм;
- Сергели туманида 5,6 миллиард сўм маблағ мавжуд.
Таъкидланишича, республика бюджетига солиқ тушумлари бўйича белгиланган прогноздан ортиқча туширилган 2 миллиард 131 миллион сўм маблағ Тошкент шаҳар маҳаллий бюджетига ўтказиб берилган.
Бундан ташқари, 2022 йил якунларига кўра ялпи ҳудудий маҳсулот (ЙҲМ) номинал ҳажми жорий нархларда 147,4 триллион сўмни ёки 13,3 миллиард долларни ташкил этган. Бу орқали ЙҲМ ҳажми 2021 йил билан таққослаганда 7,9 фоизга ўсган. Бунда хизматлар ЙҲМнинг 56,4 фоизини ёки 74,9 триллион сўмни, саноат 33,5 фоизини ёки 44,5 триллион сўмни, қурилиш 10,1 фоизини ёки 3,4 триллион сўмни ва соф солиқлар 9,9 фоизини ёки 14,6 триллион сўмни ташкил этган.
Изоҳ (0)