Польша бош вазири Матеуш Моравецкий Варшава НАТОнинг Нуcлеар Шаринг ядровий тийиб туриш дастурига қўшилишни истаётганини билдирди. Бу ҳақда у Брюсселдаги матбуот анжуманида маълум қилди.
“Россия Беларусда тактик ядро қуролини жойлаштириш ниятида экани сабабли, биз бутун НАТО блокидан Нуcлеар Шаринг дастурига қабул қилишини сўраймиз”, — деди бош вазир.
Унинг сўзларига кўра, Польша “Россия президенти Владимир Путин ҳар хил таҳдидларни ошириб бораётган бир пайтда қўл қовуштириб ўтиришни” истамайди.
Нуcлеар Шаринг — НАТО доирасидаги келишувлар, ҳарбий блокнинг барча аъзолари хавфсизлигини кафолатлаш учун альянсга аъзо мамлакатларнинг ядровий салоҳият бўйича биргаликдаги фаолиятини таъминлайди.
Биргаликда ядровий миссия фақатгина НАТОнинг Ядровий режалаштириш гуруҳидан сиёсий тасдиқ, АҚШ президенти ва Буюк Британия бош вазиридан рухсат олгандан кейингина ишга туширилиши мумкин.
Ядро қуролини тақсимлаш тўғрисидаги битим альянснинг ядровий тийиб туриш ҳамда тегишли сиёсий мажбуриятлари ва қарорларини амалга оширишга қаратилган.
НАТОга аъзо давлатлар орасида фақат учта давлат расмий равишда ядро қуролига эга: АҚШ, Буюк Британия ва Франция.
Нуcлеар Шаринг доирасидаги ҳамкорлик бўйича якуний қарор Польша ҳамкорларига, хусусан, АҚШга боғлиқ бўлади.
“Биз бу борада тезкорлик билан ҳаракат қилишга тайёрлигимизни эълон қиламиз”, — деди Польша бош вазири.
Варшава НАТО доирасида ядровий қурол бўйича потенсиал ҳамкорлик мавзусини биринчи марта кўтараётгани йўқ. Май ойида президент Анжей Дуда бу масала АҚШ билан муҳокама қилинаётганини айтган эди. Шу билан бирга, Дуда “яқин келажакда Польша ядро қуролига эга бўлишидан дарак йўқ”лигини таъкидлаган.
Изоҳ (0)