Шавкат Мирзиёев Жўқорғи Кенгеснинг навбатдан ташқари 34-сессиясида Қорақалпоғистон халқининг оғирини енгил қилишга қаратилган ишларни бундан кейин ҳам давом эттирилишини айтди.
«Ҳаммангиз гувоҳсиз, бугун шиддат билан ўзгариб бораётган ҳаёт олдимизга янги-янги вазифаларни қўймоқда. Биз замон талабларидан келиб чиқиб, келгусида сизлар билан биргаликда Қорақалпоғистонда яна кўплаб катта-катта ишларни амалга оширамиз», — деган президент.
Унинг таъкидлашича, бу янгиланишларни қорақалпоқ халқи сезиши керак. Эски усуллар билан Қорақалпоғистонда ишлаб бўлмайди.
«Худо хоҳласа, ҳаётнинг ҳар қандай синов ва машаққатларига бардош бериб, эртанги кунга катта ишонч билан яшаётган мард ва матонатли Қорақалпоғистон халқининг оғирини енгил, мушкулини осон қилишга қаратилган бу эзгу ва хайрли ишларни бундан кейин ҳам изчил давом эттирамиз», — дея сўзларини якунлаган давлат раҳбари.
Жўқорғи Кенгес сессиясида қандай масалалар кўрилди?
26 август куни бўлиб ўтган Жўқорғи кенгеснинг навбатдан ташқари 34-сессиясида давлат раҳбарининг кириш сўзидан сўнг Оқсоқоллар кенгашининг қарорига мувофиқ Жўқорғи Кенгес Раиси лавозимига тавсия этилган Аманбай Оринбаев Мурат Камалов ўрнига Қорақалпоғистон Жўқорғи Кенгеси раиси лавозимига тасдиқланди.
Сессияда президент шунча саъй-ҳаракатларга, Қорақалпоғистонга ажратилаётган катта-катта маблағларга қарамай, аҳоли кайфиятига салбий таъсир қилаётган муаммолар сақланиб қолаётганини қайд этди. Давлат раҳбари мутасадди вазирлик ва идоралар раҳбарларига Қорақалпоғистонда қўшимча имтиёз ва енгилликлар бериш бўйича аниқ топшириқлар берди.
Жумладан, Қорақалпоғистонда тадбиркорликни ривожлантириш мақсадида ҳудуд учун фойда солиғи ставкасини 15 фоиздан 7,5 фоизга тушириш, айланма солиқ ставкасини Нукус шаҳрида 4 фоиздан 2 фоизга, туманларда 2 фоиздан 1 фоизга, олис ҳудудларда эса 1 фоиздан 0,5 фоизга пасайтириш, мол-мулк ва ер солиғи ставкаларини 2 бараварга камайтириш бўйича қарор лойиҳасини киритишни топширди.
Қорақалпоғистонда саноат лойиҳаларини кўпайтириш мақсадида Инвесторларга кўмак маркази қошида Нукус шаҳридаги 10 гектар ер майдонида Саноат технопаркини ташкил этиш, 5 йил муддатга фақат Қорақалпоғистон тадбиркорларига экспорт маҳсулотларини ишлаб чиқариш учун сотиб олинган хом ашёларни, Ўзбекистон бўйлаб ташишда 70 фоиз транспорт харажатларини қоплаб бериш тизимини йўлга қўйиш ва бошқа топшириқлар берилди.
Таълимни ривожлантириш ва ёшларни қўллаб-қувватлаш бўйича таклифларидан келиб чиқиб қорақалпоғистонлик ёшлар учун Ўзбекистондаги барча ОТМларда алоҳида 6,5 мингта қабул квоталари жорий этиш вазифаси топширилди.
Қорақалпоғистонда боғча, мактаб ва тиббиёт муассасалари қурилишига қўшимча 5 триллион сўм ажратиладиган бўлди.
2025 йилгача қўшилган қиймат солиғи бўйича режадан ошириб бажарилган тушумлар Қорақалпоғистон бюджетида қолдириш бўйича топшириқлар берилган. Қорақалпоғистонда аҳоли учун якка тартибдаги уй-жой қуриш мақсадида ер участкаси тақдим этиш бўйича таклифлар ишлаб чиқиш вазифаси ҳам қўйилган.
Инфратузилмани ривожлантириш мақсадида Қорақалпоғистоннинг ҳар бир шаҳри ва туманида Ички йўлларни таъмирлаш участкалари ташкил этиш, уларга етарли штат, зарур маблағ ва техникалар ажратилади. Икки ой муддатда Қорақалпоғистонда халқаро ва ички автомобиль йўлларини ривожлантириш бўйича алоҳида дастур ишлаб чиқилади.
Изоҳ (0)