O‘zbekiston liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev qashqadaryolik saylovchilar bilan uchrashuv chog‘ida kelgusi yetti yilda ta’limni rivojlantirishga oid rejalar haqida to‘xtaldi.
“Eng avvalo, 2030-yilga qadar viloyatda maktabgacha ta’lim sohasidagi qamrov yuz foizga yetkaziladi. Shu maqsadda, qariyb 1 trillion 300 milliard so‘m mablag‘ hisobidan, 1 ming 745 ta yangi bog‘cha tashkil etiladi. Olis va chekka hududlarni maktabgacha ta’lim bilan qamrab olish uchun 1 500 o‘rinli 28 ta mobil guruh tashkil etiladi”, — dedi nomzod.
Shuningdek, bog‘chalarda 12 o‘rinli 350 ta bir yillik bepul tayyorlov guruhlari va 50 ta qisqa muddatli guruhlar tuziladi.
“Kelgusi yetti yilda maktab ta’limida qo‘shimcha 130 ming o‘quvchi o‘rni yaratiladi, viloyatda o‘quvchisi 30 nafardan ortiq bo‘lgan sinflar qolmaydi. Shuningdek, 237 ta maktab mukammal ta’mirlanadi, 591 ta maktab zamonaviy o‘quv anjomlari, laboratoriya va kompyuterlar bilan jihozlanadi”, – dedi nomzod.
Shavkat Mirziyoyev tibbiyot sohasidagi rejalarni ham ma’lum qildi.
Xususan, tibbiyot sohasida 37 ta poliklinika, 95 ta oilaviy shifokorlik punkti tashkil etiladi, davolash o‘rinlari 12 mingtaga yetkaziladi.
“Qarshi shahridagi tarqoq 5 ta shifoxona negizida “Ona va bola” klasteri barpo etiladi. Nishon, Chiroqchi, Koson, Qarshi va Shahrisabz shaharlarida zamonaviy tug‘ruq komplekslari quriladi.
Kelgusi yillarda 800 nafar ehtiyojmand ayollar va ularning voyaga yetmagan farzandlarini davolash xarajatlari davlat tomonidan qoplab beriladi”, – dedi nomzod.
Izoh (0)