Экология, атроф-муҳитни муҳофаза қилиш ва иқлим ўзгариши вазирлигининг Бекобод шаҳри бўлими бошлиғи хизмат вазифасини бажараётган вақтида пичоқланганди. Тошкент вилояти ИИББ матбуот котиби гумонланувчи шахс ушланганини эълон қилди.
Воқеа 19 июнь куни юз берганди. Тошкент вилояти экология, атроф-муҳитни муҳофаза қилиш ва иқлим ўзгариши бошқармаси Бекобод шаҳар бўлими бошлиғи, давлат инспектори М.Ф. хизмат вазифасини бажараётган вақтида пичоқланган. Ҳозирда инспекторга тиббий ёрдам кўрсатилмоқда. Бемор операция қилиниб, жонлантириш бўлимига ўтказилган.
Вилоят ИИББ ахборотига кўра, ҳолат юзасидан 19 июнь куни Бекобод тумани ИИБ Тергов бўлими томонидан Жиноят кодексининг 104-моддаси 2-қисми (қасддан баданга оғир шикаст етказиш) “и” банди билан жиноят иши қўзғатилган. Гумонланувчи шахс У.Х. (1978 йилда туғилган) процессуал тартибда ушланган.
Маълум бўлишича, ҳолатга шахсларнинг ўзаро келишмовчиликлари сабаб бўлиб, жанжал вақтида фуқаро ўзи билан олиб келган ошхона пичоғи билан таниши М.Ф.га қасддан тан жароҳати етказган.
Изоҳ (0)