Самарқанд шаҳрида яшовчи эркак интернет орқали танишиб қолган аёлнинг уятсиз видеоларини интернетда тарқатиш билан қўрқитиб, ундан тамагирлик йўли билан 5 миллион сўм олган вақтида қўлга олинди. Бу ҳақда “Дарё”га вилоят ИИБ ахборот хизмати хабар берди.
Маълум бўлишича, 33 ёшли аёл ва 40 ёшли эркак 2023 йилнинг март ойида интернет орқали танишиб қолиб, ишқий муносабатда бўлиб келган. Муносабатлар май ойида янада яқинлашган ва улар тўрт-беш маротаба яқин муносабатда бўлган.
“Вақт ўтиб ўртада муносабатлар бузилгач, эркак аёлнинг шаъни ва қадр-қимматини камситувчи, шарманда қилувчи, энг ёмони уятли ҳолатлари туширилган видеоларини интернет тармоқларига тарқатиш билан қўрқитиб, ундан 5 миллион сўм пулларни товламачилик йўли билан қўлга киритишга уринган”, — дейилади расмийлар маълумотида.
Қўшимча қилинишича, тезкор тадбир давомида аризачидан товламачи эркак 5 миллион сўм пулни олаётган вақтда далилий ашёлар билан қўлга олинган.
Ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан фуқарога нисбатан Жиноят кодексининг 165-моддаси 1-қисми (товламачилик), 168-моддаси 3-қисми (фирибгарлик) билан жиноят иши қўзғатилиб, тергов ҳаракатлари олиб борилмоқда.
Изоҳ (0)