Андижондаги маҳкум уриб ўлдирилгани юзасидан тергов ҳибсхонасининг 12 нафар ходимига суд ҳукм ўқилди

Андижон вилоятининг Шаҳрихон туманида яшаган 32 ёшли С.М. 2022 йил 21 март куни ИИБ ходимлари ва бир нафар маҳкум томонидан қийноққа солиниши оқибатида тергов ҳибсхонасида вафот этганди. Унинг ўлимига сабабчи бўлганларга суд ҳукми ўқилди.

Маҳкумнинг вафоти билан боғлиқ жиноят иши юзасидан 2023 йил 22 май куни жиноят ишлари бўйича Ангрен шаҳар судида эълон қилинган суд ҳукмига кўра, ИИВ ЖИЭДга қарашли 3-сон тергов ҳибсхонасида ишловчи қуйидаги шахслар Жиноят кодексининг 104-моддаси (қасддан баданга оғир шикаст етказиш) 3-қисми “д” банди ва 206-моддаси (ҳокимият ёки мансаб ваколати доирасидан четга чиқиш) 1-қисмида назарда тутилган жиноятларни содир қилганликда айбли деб топилиб, уларнинг ҳар бирига 1 йил 6 ой муддатга ички ишлар органлари тизимида ишлаш ҳуқуқидан маҳрум қилган ҳолда 4 йил муддатга озодликдан маҳрум этилди:

• ҳибсхона бошлиғи ёрдамчиси — смена бошлиғи У.А.;
• тартибот бўлими катта инспектори Ж.Р.;
• тартибот бўлими корпус каттаси Э.Р.;
• тартибот бўлими катта назоратчиси М.Ж.;
• тартибот бўлими катта назоратчиси С.I.;
• тартибот бўлими катта назоратчиси М.М..

Шунингдек, ушбу жиноятда айбли деб топилган қуйидаги ходимлар 1 йил 6 ой муддатга ички ишлар органлари тизими ва шифокорлик лавозимларида ишлаш ҳуқуқидан маҳрум қилган ҳолда 3 йилга озодликни чеклаш жазоси тайинланди:

• 3-сонли тергов ҳибсхонаси бошлиғи Ғ.Ғ.;
• тартибот бўлими корпус каттаси З.Ш.;
• тезкор қидирув бўлинмаси катта тезкор вакили I.И.;
• тартибот бўлими назоратчиси Ж.М.;
• даволаш-профилактика ёрдам кўрсатиш бўлими бошлиғи Т.А.;
• даволаш профилактика ёрдам кўрсатиш бўлими шифокор-психиатри Ш. А..

Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланди.

Айни пайтда биринчи инстанция судининг ҳукми қонуний кучга кирмаган бўлиб, ундан норози бўлган судланувчилар томонидан апелляция шикоятлари берилган. Ҳозирги кунда ушбу шикоятлар Тошкент вилоят судининг апелляция инстанциясида кўриб чиқиш учун расмийлаштирилмоқда.