Ижтимоий тармоқда Фарғона вилоятидаги 10-сонли тергов ҳибсхонасида содир бўлаётган қонунбузилишлар ҳақида мурожаат тарқалди. Вилоят прокуратураси бунга муносабат билдирди.

Қайд этилишича, мазкур мурожаат юзасидан терговга қадар текширув ҳаракатлари ўтказилди. Текширув давомида, маҳбус Р.Т. унинг номидан ёзилган тергов ҳибсхонаси ходимлари унга тан жароҳат етказилгани ҳақидаги аризани ўзи ёзмагани, уни ким ва нима мақсадда ёзилганидан хабари йўқлигини айтган.

Шунингдек, унга нисбатан ҳибсхона ходимлари ёки бошқа шахслар томонидан тан жароҳат етказилмаганини билдириб, эълон қилинган аризани кўриб чиқишдан тугатишни ва рад этишни сўраган.

Бундан ташқари, маҳбус Р.Т. тиббий кўрикдан ўтказилганида, танасида тан жароҳатлари ва улардан қолган излар аниқланмаган.

Мазкур ҳолат юзасидан 3 июнь куни Фарғона шаҳар прокуратураси томонидан жиноят иши қўзғатишни рад этиш тўғрисида қарор қабул қилинган.