Тошкент вилояти Зангиота туманидаги 1-сон тергов ҳибсхонасида мониторинг ташрифи амалга оширилди. Бу ҳақда Омбудсман ахборот хизмати хабар берди.

Ўрганиш давомида Жиноят кодексининг 164-моддасида (босқинчилик) назарда тутилган жиноятни содир этганликда гумон қилиниб, қамоққа олинган Д.Т. ва 2511-моддасида назарда тутилган жиноятни содир қилганликда гумонланиб, қамоққа олинган Ҳ.А. билан якка тартибда холи суҳбатлар ўтказилди.

Суҳбатлар давомида ҳар икки шахс ижтимоий тармоқларда ўзи ҳақида тарқатилган хабарларни тасдиқлади. Хусусан, Д.Т.нинг сўзларига кўра, унга нисбатан Наманган вилояти Поп тумани ички ишлар бўлимида ва кейинчалик Тошкент шаҳар Ички ишлар бош бошқармасида руҳий ва жисмоний босим ўтказилган.

Қийноқлар натижасида айбига иқрор бўлган ва олган тан жароҳатларини ички ишлар органлари ходимлари томонидан етказилганлиги бўйича кўрсатма бермаган. Унинг қийноққа солингани ҳақида кейинчалик адвокати хабар қилган. Шунингдек, у ички ишлар органлари ходимлари томонидан жисмоний қийноққа солинганини тасдиқловчи асосли далиллари мавжудлигини маълум қилган.

Омбудсманнинг мониторинг ташрифи якунларига кўра, Д.Т.нинг қийноққа солингани ҳолати юзасидан олиб борилаётган терговга қадар текширув ҳаракатлари ҳар томонлама, тўлиқ ва қонуний ўтказилишининг таъминланиши юзасидан Бош прокуратурага назорат хати киритилди.