Тошкентда мигрантлар учун ахборот маркази (Мigrant Resourse Centre) очилиши кутилмоқда. Бу ҳақда Дунё” АА хабар берди.
Маълум қилинишича, Ўзбекистон элчиси Абат Файзуллаев бош қароргоҳи Вена шаҳрида жойлашган Миграция сиёсатини ривожлантириш халқаро маркази (ISMPD) бош директори ва Австриянинг собиқ ташқи ишлар вазири Михаэл Шпинделеггер билан учрашув ўтказди.
Учрашувда Ўзбекистон меҳнат бозоридаги салоҳиятли ишчи кучини Европа мамлакатларида иш билан таъминлаш, хорижий давлатларга хавфсиз, тартибли ва қонуний меҳнат миграцияси тизимини жорий қилиш масалалари муҳокама қилинди.
Музокаралар давомида ISMPD ва Ўзбекистон ваколатли идоралари билан ҳамкорликда Тошкент шаҳрида мигрантлар учун ахборот маркази (Мigrant Resourse Centre) очишга келишиб олинди.
Ушбу марказнинг вазифаси Европа мамлакатларида ишлаш истагида бўлган Ўзбекистон фуқароларини тегишли ахборот билан таъминлаш, жумладан, мамлакатлар миллий қонунчилиги, маданияти ва ишга жойлашиш тартиб-қоидалари билан таништириш, уларга тегишли консултация хизматини кўрсатишдан иборат бўлади.
Маълумот учун, Миграция сиёсатини ривожлантириш халқаро маркази (ISMPD) 1993 йилда Австрия ва Швейцария ташаббуси билан ташкил этилган бўлиб, бугунги кунда 20 та аъзо давлатни бирлаштирувчи ва БМТда кузатувчи мақомига эга халқаро ҳукуматлараро ташкилот ҳисобланади. ISMPD бугунги кунда 90 дан ортиқ мамлакатларда миграция масалалари бўйича эксперт билим ва кўникамалар бериш ҳамда хизматлар кўрсатиш билан шуғулланади. Марказий Осиёда чегараларни бошқаришга ёрдам бериш дастурини (BOMKA) амалга оширишда иштирок этади ҳамда Прага жараёнининг котибияти вазифасини ҳам бажаради.
Изоҳ (0)